«Бәйрәм йөрәге синдромы» нәрсә ул?

Бу «бәйрәм йөрәге синдромы» булырга мөмкин. Аның ни өчен барлыкка килүен һәм бу очракта нишләргә кирәклеген гади тел белән кардиолог Ленар Кашапов аңлата.

Бу нәрсә һәм кемнәр куркыныч төркемендә?
Бу – йөрәк ритмы бозылу өянәге. Ул хәтта элек йөрәк белән проблемалары булмаган кешеләрдә дә килеп чыгарга мөмкин. Йөрәк тигез типми, «дерелди» төсле тоела.

«Бәйрәм йөрәге синдромы» - организмның кисәтү сигналы. Йөрәк мөмкинлекләре чик дәрәҗәдә эшләвен күрсәтә. Мондый хәлләрне игътибарсыз калдырырга ярамый – киләчәктә даими аритмия һәм башка катлауланулар куркынычы арта.

Куркыныч төркемендә:
•    40–45 яшьтән өлкәнрәкләр;
•    Кан басымы күтәрелүдән иза чигүчеләр;
•    Диабет, артык авырлык, төнлә сулыш туктаулар (апноэ) күзәтелгән кешеләр;
•    Әлегә ачыкланмаган йөрәк проблемалары булганнар.

Ни өчен бәйрәм йөрәккә зыян китерә? 4 төп сәбәп:
1.    Алкоголь – иң төп сәбәп. Ул йөрәк күзәнәкләренә начар тәэсир итә, калий һәм магний кебек мөһим матдәләрне киметә, сусызлану һәм стресс гормоннары артуга китерә.
2.    Тозлы ризык һәм артык ашау. Тоз организмда су тота, йөрәккә йөк арта. Тулы ашказаны йөрәккә механик басым ясый.
3.    Йокы җитмәү, режим бозылу. Бу йөрәкне «тизләтүче» нерв системасын активлаштыра.
4.    Көчле хис-кичерешләр. Хәтта шатлык та адреналин бүлеп чыгара, ул аритмияне кузгатырга мөмкин.

Әгәр өянәк башланса, нишләргә? «Беренче ярдәм» алгоритмы:
•    Паникага бирелмәскә. Курку хәлне начарайта.
•    Утырырга яки ятарга, тынычланырга, һава керүен тәэмин итәргә.
•    Бер стакан гади су эчәргә (газсыз, бүлмә температурасында булса яхшы).
•    Кан басымын һәм пульсны үлчәргә.
•    Яңа дарулар, алкоголь, кофе, энергетиклар кабул итмәскә.

Әгәр бу халәт 30–40 минуттан узмаса, күкрәктә көчле авырту, тын кысылу, баш әйләнү, көчсезлек булса.ашыгыч ярдәм чакыртырга.

«Акыллы бәйрәм итү» кагыйдәләре:
1.    Иң яхшысы – алкогольдән тулысынча баш тарту. Әгәр дә инде спиртлы эчемлекләр кулланыла икән, чамасын белеп эчегез. Алкогольне икеләтә су порциясе белән чиратлаштырыгыз. 
2.    Тозлы кабымлыкларны киметегез. Тозлаган, каклаган ризыкларны азрак ашагыз.
3.    Ач карынга эчмәгез. Ашамыйча эчү тизрәк исертә.
4.    Йокы режимын саклагыз. Бәйрәмдә дә мөмкин кадәр вакытында йокларга ятыгыз.
5.    Магний эчегез. Табиб белән киңәшеп, бәйрәмнәр алдыннан магний курсы йөрәккә ярдәм итә ала.
6.    Тикшеренү нәтиҗәләрен саклагыз. ЭКГ, холтер нәтиҗәләре кул астында булсын.

Әгәр бу хәл кабатланса – терапевтка яки кардиологка мөрәҗәгать итү кирәк.