Йөклелеккә яңача караш

РФ Сәламәтлек саклау министрлыгы кыйммәтле тестны “акушерлык һәм гинекология” профиле буенча ярдәм күрсәтү протоколына кертергә тәкъдим итте.  Моннан соң йөкле хатын-кызлар өчен ул бушлай булачак дигән сүз. 

Инвазив булмаган пренаталь тест үткәрү ана каны аша яралгының күзәнәктән тыш ДНКсы билгеләнә. Шул рәвешле булачак баланың авыр чирләргә китерергә сәләтле хромосом аномалияләре бармы-юкмы икәне ачыклана.

Моңа кадәр безнең илдә диагностика стандарты булып биохимик пренаталь скрининг саналган, ул яралгының өч хромосом аномалиясе – Даун, Эдвардс, Патау синдромнары куркынычын ачыклаган. Мондый тестлаштыру бик төгәл булмаган, һәм күп кенә шикле очракларда йөкле хатын кызларга яралгы күзәнәкләрен алып, җитдирәк тикшерү узарга тәкъдим иткәннәр. Ә бу хатын-кызның да, карындагы баланың да сәламәтлеге өчен өстәмә куркыныч тудырган. 

Инвазив булмаган пренаталь скрининг соңгы дистә елда популярлык казанган. Баштарак йөкле хатын-кызның кан анализы чит ил лабораторияләренә җибәрелгән һәм нәтиҗәне бер айдан артык көтәргә туры килгән. Аннары бу эшкә Россия лабораторияләре дә алынган. Ләкин тикшеренүнең бәясе Казан клиникаларында, әйтик, ничә төр патологиягә тикшерүгә карап, 30-55 мең тәшкил итә. Бу күпләр өчен матди яктан авыр йөк.  Анализны бушлай үткәрү мөмкинлеге репродуктив потенциалны ныгытырга ярдәм итәчәк, диләр РФ Сәламәтлек саклау министрлыгында.

Йөкле хатын-кызларны тагын нинди яңалыклар көтә?
•    Йөклелек вакытында пациентлар, ким дигәндә, ике тапкыр медицина психологы консультациясе узачак; 
•    Диспансер күзәтү тәртибе үзгәрәчәк – акушер-гинеколог хатын-кызның беренчел мөрәҗәгатеннән соң 14 көн эчендә (йөклелекнең дүртенче-җиденче атнасында мөрәҗәгать иткән очракта) исәпкә куярга тиеш. Соңрак срокта килгән очракта бу 7 көн эчендә башкарылырга тиеш; 
•    Хатын-кызларны тизрәк һәм җентекләбрәк тикшерәчәкләр: барлык анализлар һәм белгечләр консультацияләре пациент мөрәҗәгать иткәннән соң беренче 14 көн эчендә үткәрелергә тиеш; 
•    34-36 атна срогында яралгыны өстәмә тикшерү (пренаталь диагностика) күздә тотыла; 
•    Бала тапканнан соңгы чорда кайбер очракларда өйдә патронаж мөмкинлеге каралган.