“Ни өчен ЭКО ясату белән дәүләтнеке түгел, шәхси клиникалар шөгыльләнә?”

“Бу күп тапкыр ясала торган катлаулы процесс, аның ярдәмендә 2024 елда 508 бала дөньяга килде”, – дип хәбәр итте Татарстан Территориаль мәҗбүри медицина иминияте фонды директоры Алсу Мифтахова җиденче чакырылыш Татарстан Дәүләт Советының унынчы утырышында.
Дәүләт Советы депутаты Дмитрий Самаренкин ни өчен ЭКОны фәкать шәхси клиникаларда гына ясатып булуы борчый. 
– Әгәр дә органнарны дәүләт хастаханәләрендә күчереп утырталар икән, ни өчен ЭКОны аларда үткәрә алмыйбыз? Бүген демография проблемасы, әлеге түләүле процедуралар 400 мең сумнан 1 миллионга кадәр тора. Шуны истә тотып, дәүләт медицинасына күчереп булмыймы аны? – дип сорады Самаренкин.

Алсу Мифтахова әйтүенчә, белгечләр һәм җиһазлар булган очракта ЭКОны чыннан да дәүләт медицина учреждениеләре базасында уздырырга мөмкин. 
– 7 нче хастаханә базасында перинаталь үзәк проектлан вакытта анда ЭКО уздыру мөмкинлеге күздә тотылган иде. Кызганычка, соңыннан Сәламәтлек саклау министрлыгы үзенең позициясе үзгәртте. Бүген Татарстанда бу эш белән җиде шәхси клиника шөгыльләнә, – диде ул.

ЭКОга чиратның чынлап та булуын таный, әмма ул норматив финанслау белән бәйле дип аңлатты. Быел моның өчен 268 миллион сум бирелгән. Республика үз бюджетыннан да 40 миллион сум бүлеп биргән.

Фото: https://gossov.tatarstan.ru/