Талпан уянган – саклан!

2 казанлы талпанны Лаеш һәм Питрәч районындагы урманга һәм бакча кишәрлегенә барып эләктергән, тагын ике очрак Яшел Үзәндә, берәр очрак Кама Тамагы һәм Зәйдә теркәлгән. Димәк, табигать кочагына чыкканда, бакчаларга барганда, парк һәм скверларда ял иткәндә талпаннардан саклык чараларын күрү мөһимлеге арта. 

Роспотребнадзорның Татарстан буенча идарәсе башлыгы урынбасары Любовь Авдонина сүзләренчә, территорияләрне талпаннарга каршы эшкәртү апрельдә башланачак. Кешеләрне исә, урман-посадкаларга чыкканда, дөрес киенергә чакыралар. Иң беренче, тәнне тулысынча каплый торган ачык төстәге кием сайларга киңәш ителә. Куаклардан читтәрәк торсаң яхшы – талпаннар күбрәк нәкъ шунда була. 15-20 минут саен үзеңнең һәм яныңдагы кешенең киемен һәм тәннең ачык өлешләрен тикшереп тору да комачауламас. Урманнан чәчәк, яфрак бәйләмнәре алып кайтудан да баш тарту хәерле – алар белән бергә талпан алып кайту куркынычы зур.

Әгәр инде талпан кадалган икән, аны медицина оешмасына барып алдырырга киңәш ителә. Татарстан Сәламәтлек саклау министрлыгының штаттан тыш баш эпидимеологы Дмитрий Лопушов билгеләп үткәнчә, ниндидер кискенләшүләр барлыкка килмәсен өчен талпаннарны дөрес итеп ала белергә кирәк. Талпан алынганнан соң, аны махсус лабораториягә тикшерүгә җибәрәләр. Ул боррелиоз яки энцефалит  белән зарарланган  булса, кешегә иммуноглобулин кадыйлар. 

-    Кеше талпанны тәненнән үзе алып, медицина оешмасына мөрәҗәгать итмәгән очракта, 21 көн дәвамында үз сәламәтлеген күзәтергә тиеш. Әгәр дә тән температурасы күтәрелә калса, талпан кадалган җир кызарып чыкса яки боҗрасыман тамгалар барлыкка килсә, шунда ук поликлиникага мөрәҗәгать итәргә һәм табибка талпан кадалуы турында хәбәр итәргә кирәк, - дип кисәтте Дмитрий Лопушов.