Тырнак авыруы гаилә әгъзаларына да куркыныч тудыра

Аларны дәвалау күпкә озаграк вакытны ала, хәтта кыйммәтрәк тә чыгарга мөмкин. Билгеле, иң яхшысы – диагностика чараларын үтәп бару. Өй шартларында булса да, гади процедуралар ясау файдалы. 

Подолог Эльвира Саурова фикеренчә, онихокриптоз (тирегә кереп үскән тырнак авыруы) тырнакны туры итеп кисмәүдән барлыкка килә. Күбебез моңа колакка салмыйча, шулай эшләүне дәвам итә, ләкин бер вакыт ул үсеш ала. Мисал өчен, беренче стадиядә кызару күренә, авырту сизелә. Алга таба шешә башлый. Өченче этапта исә, хирург катнашы таләп ителергә мөмкин. Алар, үз чиратында, пластинаны алырга тәкъдим итәләр. Подолог бурычы шунда ки – тырнакның аз өлешен генә өзеп, ялкынсынуны бетерү. Моннан соң клиент өч көн рәттән бәйләүгә йөри. 

– Кешенең аяк табаны, тырнаклары сәламәтлегенә витаминнарга бай яшелчә, җиләк-җимешләр ашау йогынты ясый, – ди подолог. – Өстәмә БАДлар эчү дә каралган. Аеруча, калий, цинкның рационда булуы уңай тәэсир итә. Дөрес аяк киеме сайлау – тагы бер шарт булып тора. Аяк киеме берүк тар булмасын. Бармаклар үзләрен иркен хис итәргә тиеш. Дөрес аяк киеме сайлап алмау аркасында онихокриптоз, шеш барлыкка килү ихтималы бар. Кызганыч, анардан котылу юлы – операция. Үкчәле туфлинең биеклеге 7 сантиметрдан артмаска тиеш. 

Подологның тагын берничә киңәшенә колак салыйк. Хәтта оекбаш сатып алганда да, аны этикетка язуына гына карап алу дөрес түгел. Үз аягыгызны үлчәп барып, сайларга кирәк. Размеры туры китерерлек яисә бер-ике размерга зуррак булса әйбәт. Мамыктан җитештерелгәненә игьтибар итегез.
Эльвира сүзләренә караганда. тырнак гөмбәчеген диагностикалау һәм дәвалау анализлар тапшырудан башлана. Алар әзер булгач, авыру расланган икән, дәвалау дерматологта дәвам итә. Даруларны эчкәннән соң, авыру кеше атнага бер тапкыр подологка күренергә килә.

– Иң таралган тырнак авыруы – гөмбәчек, аны отель, бассейн, сауна, диңгездә йоктыру ихтималы зур. Гаилә әгъзалары да куркыныч тудыра. Әгәр шул ук оекбаш, чүәк киеп йөрисез икән, саклану чараларын истә тотарга кирәк. Урын-җир дә инфекция йоктыру ролен үти. Кыскасы, һәр гаилә әгъзасының үз гигиена әйберләре булырга тиеш. Әйтеп узасы килә: тырнак авыруларын дәвалауның өч елга сузылган очраклары да шактый. Шуңа курә, вакытны озакка сузмыйча, табибларга күренергә кирәк. Кайберәүләр нәкъ менә подолог бүлмәсендә хроник чирләре барлыгын белеп алалар, – ди Эльвира. 

Подолог укучыларыбызга, аяк һәм кул тиресен крем ярдәмендә дымландырырып торырга, педикюр ясарга киңәш итә. Аяк табанын коры килеш пемзаның йомшаграк ягы белән ышку таләп ителә. Әлеге гамәлләрне үтәү эстетик матурлыкны һәм аякларның сәламәтлеген арттырыр, ди белгеч. 

 Алинә Фәхретдинова.