#«Сәхнә» журналыннан 31 март 2026, 12:21

Камал театрында Рәдиф Гаташның 85 еллыгы: шигърият, хатирәләр һәм җылы очрашулар кичәсе

31 март 2026, 12:21

Камал театрының Көнчыгыш залында Татарстанның халык шагыйре, Тукай премиясе лауреаты Рәдиф Гаташның 85 яшьлек юбилее узды.

Скопировать ссылку

Олуг әдипне котларга шагыйрьләр, язучылар, җәмәгать эшлеклеләре һәм аның иҗатын яратучы тамашачылар җыелды.

Кичә Сабир Өметбаев исемендәге Минзәлә татар дәүләт драма театры артистлары әзерләгән шигъри композиция белән башланып китте. Алар Рәдиф Гаташ әсәрләрен сәнгатьле итеп яңгыратты, ә артистларның муеннарына таккан “күбәләк”ләр шагыйрь образына ишарә итеп, тамашага аерым бер төсмер өстәде.

Рәсми өлештә Татарстан Республикасы Мәдәният министры урынбасары Ленар Хәкимҗанов һәм Татарстан Язучылар берлеге рәисе Ркаил Зәйдулла чыгыш ясады. Алар шагыйрьнең иҗатын югары бәяләп, аның бүген дә яшьләр белән бер дулкында булуын билгеләп үттеләр. Шул ук вакытта Ркаил Зәйдулла юбилярга “Әдәбияттагы казанышлары өчен” медален тапшырды.

Кичәнең икенче өлешендә сәхнәгә Рәдиф Гаташның шәкертләре – бүгенге татар шигъриятенең күренекле вәкилләре чыкты. Алар остазларының шигырьләрен укыды, шәхси истәлекләре белән уртаклашты. Тамаша барышында экранда архив фотолар күрсәтелеп, кичәгә аеруча җылылык өстәде.

Юбилейга шагыйрьнең туган ягы Башкортстаннан да кунаклар килгән иде. Халисә Мөдәррисова Рәдиф Гаташ белән озак еллар дәвам иткән дуслыгы турында сөйләде һәм аны остаз буларак зурлады.

Кичәнең ахырында сүзне юбиляр үзе алды:
“Сезгә ничек тоелгандыр, миңа бик ошады. Бу – дуслар белән очрашу, шигърият белән уртаклашу кичәсе булды”, – диде Рәдиф Гаташ һәм үзенең шигырьләрен укып тамашаны йомгаклады.

Белешмә: сценарий авторы – Лилия Гыйбадуллина, режиссёр – Нәфисә Исмәгыйлева, музыкаль бизәлеш – Динә Закирова.

Таңсылу Мостафина

Кызыклы яңалыкларны күзәтеп бару өчен безнең МАХ каналына кушылыгыз.