Альбина Апанаева: “Дөресен әйтәм, бераз ачу килде инде”

Шулай да, Дилә Нигъмәтуллина белән Зәринә Асылкаева дуэт яздыргач, сүзсез калмады. Альбина Апанаева нәрсә белән мәшгуль? Дилә Нигъмәтуллинага ачу саклыймы? Бу сорауларны үзенә бирдек.

– Барысы да яхшы, Аллаһка шөкер. Үз студиямдә рәхәтләнеп эшлим. Быел аның бер яшьлек туган көнендә үткәрдек. Сентябрь ае бик тыгыз булды: чыгышлар, концертлар, балалар өчен музыкаль спектакльдә катнашу. Музыкаль спектакль шундый зур уңыш белән барды, ун минутлык тәнәфес белән 4 тапкыр куйдык. Шулай да бераз тын алсам, ял итәргә вакыт булса, шатланыр идем. Әлегә ялга хыянәт итеп, көне-төне эшлибез. Кызым Миралия 6 нчы сыйныфта укый. Ул да минем кебек иҗат кешесе. Актерлык осталыгы һәм вокал белән шөгыльләнә. 

– Күптән түгел генә Дилә Нигъмәтуллина дуслык турында дуэт яздырды. Сез моңа нинди карашта?
– Әйе, Дилә белән уртак, дуэт җырларыбыз да бар. Дилә дуслык турында җырны Зәринә белән башкаргач, башта югалып калдым. Дөресен әйтәм, бераз ачу килде инде. Әмма мин үпкә сакламыйм. Дилә белән дә без һәрвакыт элемтәдә. Күптән түгел генә күрештек. Гомумән, мин бөтен җырчылар белән дә яхшы мөнәсәбәтләрдә. 

– Сезнең беренче иҗат җимешләрегез тагын бер кат популярлашып китә алырмы? Җырларны яңартып башкару да “мода”да бит. 
– Мин беренче иҗат җимешләремне хәзер дә башкарам. Аеруча “Чын дустым” җырын. Мин аны “иске” җыр дип атый да алмыйм. Ул хәзер дә бик популяр, кайда гына барсам да, тамашачылар шул җырны башкарырга сорый. Җырның авторлары Оскар Усманов һәм Гөлсәрвәргә зур рәхмәтләремне җиткерәм. Алар дуслык гимны иҗат иттеләр. Әлбәттә, тамашачым да минем белән бергә үсә. Үткәннәрне сагынып искә алучылар да бар. Әмма хит җырларга яшьләр дә битараф түгел, тыңалап торалар, шөкер. 

– Җырыгызны яшьләр яңартып башкарырга теләсә, каршы килмисезме?
– Мин үземне бик олы яшьтә дип әйтмәс идем (көлә). Шулай да әгәр яшь башкаручылар җырга яңа сулыш өстәргә тели икән, рәхим итсеннәр. Сандыкка салып, йозакка бикләп тотып булмый бит аны.