Алия Исрафилова: "Әти-әнинең никахын әтисез генә укытканнар"

- Алия, син җырлы гаиләдә тугансың икән. Әти-әниең турында сөйлә әле.

- Мин - Казан кызы. Әнием - Тәтеш районы Олы Тархан авылы кызы, әтием - Зәй районы Шыкмай авылыннан. Алар университеттагы "Каз канаты" исемле үзешчән ансамбльдә танышкан. Икесе дә җыр-моңга гашыйк, җыр-биюгә оста. Бу - уникаль ансамбль, алар хәзер дә үзара бик дус. Анда йөргән егетләр-кызларның күбесе зур уңышка ирешеп, дәрәҗәле урыннарда эшли. Алар арасында КФУның милли һәм глобаль медиа чаралары кафедрасы мөдире, профессор Васил Гарифуллин да бар.

- Һөнәрләре буенча кем алар?

- Әни табиб булырга хыялланган, әмма биология факультетында белем алган. Башта 13нче татар гимназиясендә биология укытучысы булып эшләде. Мин дә, сеңлем дә шул гимназияне тәмамладык. Оныклары тугач, эштән китеп, безнең балаларны тәрбияләде. Алар үскәч, кабат мәктәпкә урнашты. 155нче мәктәптә эшләп алды, хәзер 71нче мәктәптә укыта. Эшен бик ярата, "мәктәп - үзе дөнья", ди. Әти физика һәм математика факультетында укыган, ул - эшмәкәр. Хәзер дә фән белән шөгыльләнә. Әти Казанда МЖК (яшьләр торак комплексы) проектын гамәлгә ашырды. МЖК проектында КАИны да катнаштыру өчен әти Мәскәүгә барып акча алып кайткан. Аның асылы шунда - студентлар йорт төзелешендә катнашып, укуда ирешкән уңышларын исәпкә алып фатирлы була.

- Әтиеңә дә шуннан фатир биргәннәрдер инде?

- Анысы аерым бер тарих. Әйе, аңа төзелгән йорттан фатир сайлап алу хокукы бирелде. Ләкин бергә эшләгән коллегалары әтигә аяк чалырга теләп каршы чыккан. Әти белән әнинең никах көнендә әтинең эшендә җыелыш булган. Әни әтине авылда никахка көтә, ә әти эштән китә алмый, чөнки фатир алу мәсьәләсе хәл ителә. Телефоннар булмагач, авылга кайта алмавын хәбәр итә алмаган. Нәтиҗәдә никахны әтисез генә укытканнар. Шулай итеп, әти белән әни фатирлы да, никахлы да булган. Әти эшмәкәр булгач, безнең барысы да булды, юклыкта үсмәдек. Бернинди кытлык та кичермәдек. Әти алган фатирда хәзер без яшибез, ә әти-әни үз йортлары белән тора.

Әңгәмәнең дәвамын "Шәһри Казан. Язмыш" газетасының 12 май санында укыгыз. Сату нокталарында сорагыз.