«Әти-әниләре исән-сау, әмма туйга алар икенче тормыш иптәшләре белән киләләр...»

– Гөлназ, матур бәйрәмегез белән котлыйбыз.  Әмма ни өчен нәкъ 11 елны бәйрәи итәргә булдыгыз? 
– Без нумерология ышанабыз. Безгә 10, 20, 50 кебек түгәрәк саннарны билгеләп үтмәскә куштылар. Узган елны, дөресен әйткәндә,  җайбыз да булмады. Ә быел банкет залы да булды, көне дә 11 ел элек кебек пәнҗешәмбе туры килде. Гомумән, бу ел безнең өчен бик уңышлы, шөкер. Самарада Идел буенда иң яхшы алып баручы исемен яулау, Илсурның авылында Шәрипҗановфест үткәрү. Икәү сөйләшеп, 11 ел бергә гомер итүебезне билгеләп үтәргә булдык. 

– 11 ел эчендә мөнәсәбәтләрегез үзгәрдеме? 
– 11 ел эчендә төрле хәлләр булгандыр. Әмма без бу өлкәдә эшләгәч, туйларда күпләрнең әти-әнисе аерылышкан булуын күрәбез. Алар исән-сау, әмма икенче тормыш иптәшләре белән киләләр. Бу мизгелдә балаларның бәгырьләре өзеләдер. Шуны да истә тотып, бергә-бергә "тырмашып" яшәргә кирәк.  Дистә еллар узгач, менә шушы мөнәсәбәтләрне, мәхәббәтебезне саклап кала алдык дип әйтү дә кадерле. Кызып китеп: "Бар кит", - дип әйтү җиңелдер. Әмма алай булмый. Мин хәзер берүзем бернәрсә булдыра алмыйм, Илсур да шулай ук. Без моны аңлыйбыз, шуңа да бер-беребезгә хөрмәтебез зур. 

– Никах укытырга Илсурга сез тәкъдим ясагансыз дип беләм. Өметләрегезне акладымы?
–  Кичә дә сүз әйткәндә: "Ярый әле, Илсур, никах укытырга тәкъдимемне кире какмадың"- дидем. Илсур да: "Башка кеше белән гаилә коруымны, Гөлназ урынында башка кеше булуын күз алдына да китерә алмыйм. Миңа Гөлназ белән рәхәт", - диде. Гаиләбез өчен бик истәлекле көн булды. Мәхәббәтебез озын гомерле булсын!

Фотолар шәхси архивтан