Эльмира Кәлимуллинаның җыры белән бәйле туган бәхәс: «Җырлагыз, әмма хокукларны бозмагыз»

Җырчының аранжировкасын кулланып, яшь башкаручы “Яндекс. Музыка” челтәрендә шул ук җырны башкарып урнаштырган. Бу хәлгә ачыклык кертү өчен Эльмира белән хәбәргә чыктык.

- Мин бу җырга аранжировканың минусын үзем урнаштырдым. Иҗатымны хөрмәт итүче, яратучы тамашачым рәхәтләнеп җырлый алсын дидем. Фестиваль, конкурс, мәҗлесләрдә җырлауга мин шат кына. Җырлар яшәргә тиеш. Әмма минем аранжировканы алып, тавыш яздырып, музыкаль мәйданчыкка урнаштыру икенче мәсьәлә. Аранжировка - ул интеллектуаль милек. Мин аны акча түләп алдым, бөтен рәсми кәгазьләр, документлар кулымда. Әгәр шушы җырның авторлары белән килешеп, бөтенләй башка аранжировка ясап, җыр чыгарсалар бер сүз дә әйтмәс идем. Җырлагыз, әмма хокукларны бозмагыз. Бу хәлдә баланы гаепле дип санамыйм. Аның төп эше - матур итеп җырлау. Ә әти-әниләр һәм укытучыларга, әлбәттә, сораулар бар. Алар зур кешеләр. Канунны белмәү - җаваплылыктан азат итми. Сәнгатькә җиңел кармасак иде. Сәнгать, иҗат та шул ук завод кебек эшләп тора. Әгәр һөнәргә киләсең икән, эшнең бар нечкәлекләрен өйрәнергә кирәк. 
Әлегә мин “Яндекс.Музыка”га хат юлладым. Ике бертөрле аранжировканың музыкаль мәйданчыкта пәйда булуы аларның да хатасы. 

- Җырны яңартканда беренче башкаручыдан рөхсәтне бик сирәк артистлар гына сорый. Бу хәлгә ничек карыйсыз?
- Беренче башкаручыдан рөхсәт сорау мәҗбүри эш түгел. Әгәр авторлар каршы булмаса, җырны яңартырга була. Ләкин гадел булып каласың килсә, беренче башкаручы белән сөйләшү кирәк инде. Бу барыбер хөрмәт күрсәтү билгесе. Дөрес, мин дә шулай кыен хәлдә калдым. Бер җырчының җырын яңартырга булдым. Яңа аранжировка эшләдем, авторлар белән килештем, ризалык алдым. Беренче башкаручы белән дә хәбәргә чыктым. “Үзем җырлыйм, 20 ел җырламыйча бирмим”, - диде. Тагын элемтәгә кереп карадым, авторлар риза бит инде. Җавап бирмәде. Менә шулай үзе халыкка таныла алмагач, башкаларга да юл кисәргә теләүчеләр бар. Ә җыр эшсез ята. Бик кызганыч, бу җырны чыгармадым. Бөтенләй юк сәбәптән, бәхәс тудырырга мөмкинлек бирәсем килмәде. Аллаһка шөкер, җырларым күп бит. Эшләп, иҗат итеп торырга язсын.