Эстрада артистлары - соңгы кыңгырау бәйрәмендә: "Күз яшьләре чыгам-чыгам дип тора"

Ләйсән Гимаева белән Булат Бәйрәмовның кызлары Таңсылу 19нчы гимназияне тәмамлады. “Алда ЕГЭ, алда зур тормыш. Киләчәгең якты булсын, балам”, - дип матур теләкләрен тели Ләйсән.

Әнвәр Нургалиевның кызы Элина да мәктәпне тәмамлаган. “Уза гомер, ага еллар елга сыман. Безнең гаилә өчен, чыннан да, соңгы шылтырау булды. Оныкларныкын көтәсе кала инде. Салман белән Саидныкын (мәрхүм Динаның игезәк уллары). Кызыбыз бүген 11нче сыйныфны, Аиша 1нче сыйныфны тәмамлады. Күңелләр тула, яңа гына 1нчегә барган идек. Узган гомер. Тик бер генә теләк – балаларыбыз бәхетле, юллары ачык булсын, әти-әниле булсыннар, сугыш күрмәсеннәр”, - дип язган Әнвәр.

Җырчы Марат Шәйбәковның да улы Марсель 11нче сыйныфны тәмамлаган. “Шундый дулкынландыргыч көн бүген, күз яшьләре чыгам-чыгам дип кенә тора. Әле генә 1нче сыйныфка барган идек, әй гомернең үтүе, дуслар! Улыма ак юллар, зур уку йортларына керергә язсын. Тик изге кешеләр генә йөрсен яннарында Ходаем. Бәхетле, озын гомерле бул, улым”, - дип якты теләкләрен юллаган Марат.

Алып баручы Гөлназ Миньязованың улы Сәет өчен дә соңгы кыңгырау чыңлаган. “Әле кичә генә җыенып 1нче сыйныфка укырга бардык. Улыбыз үсте. Чыгарылыш сыйныф укучысы тасмасын елый-елый бәйләдем. Бүлмәсеннән киенеп чыккач,  тагын еладым. Гомер шундый тиз уза”, - дип хис-кичерешләре белән уртаклашкан Гөлназ.