Фирдүс Тямаев: “Кәеф төшереп, уфтанып утырып булмый”

Җырчы: “Концерт-дискотека ясыйм”, – дип вәгъдә итә. Күптән түгел генә социаль челтәрләрдә дә концерт турында төрле фикерләр яңгырады. Аларга ачыклык кертү өчен Фирдүс Тямаев белән сөйләштек.

– “Татар эстрадасы җырчылары стадионнар җыя алмый”, – дигән сүзләр дә булды. Ни уйлыйсыз?
– “Татнефть-арена”да беренче тапкыр концерт куям. Шуңа күрә төгәл бернәрсә дә әйтә алмыйм. Ришат Төхвәтуллин белән дә сөйләштек. Чыгымнар күп, әлбәттә. Әле тулаем барысын исәпләмәдек, әмма 10 миллионнан күбрәк акча тоттык инде. Нәрсәнедер эшләп карамыйча бәя биреп булмый. “Безнең татар эстрадасы “Татнефть-арена”ны җыя алмый”, – дип әйтергә кирәкми. Мин болай да УНИКСта 15 көн концерт куйдым. Димәк, 15 мең тамашачы концерт караган булып чыга. Шулай да, әйткәнемчә бу – яңа тәҗрибә. Эшләп карыйбыз, әгәр тамашачылар азрак икән, димәк, Фирдүс Тямаевка яңа продукт кирәк. Кәеф төшереп, уфтанып утырып булмый. Өйрәнергә, эзләнергә кирәк.

– Концертта чакырылган артистлар буламы?
– Бик күп бүләкләр әзерләдек. Гүзәл Хөснетдинова (Женщина огонь блогер) белән хезмәттәшлек итәбез. Ул үзеннән Мальдив утрауларына сәяхәт һәм айфон бүләк итә. “Кыстыбый” кафесы да сертификатлар бирә. Үзебез дә бүләкләр әзерләдек. Кешеләр ял итеп кенә түгел, бүләкле дә булсыннар дип тырыштык. Барыбер андый әйбер истә кала бит. Ә артистлар буенча уйлыйм әле. Берьяктан, кешеләр мине тыңларга килә. Икенче яктан, яшьләрне дә үстерергә телим. Әлбәттә, хәләлем Резидә җырлыячак. Бергә дуэт башкарабыз. Концерт программасында номерлар да күп. 15 ел сәхнәдә булгач, репертуар тупланды, шөкер. Һәр җырны башкарасы килә. Шуңа серләрне чишеп бетермим.