Гөлназ Сираева ботоксның файдасы һәм зарары хакында сөйләде

Ул үзенең Инстаграм битендә һәрвакыт матурлык серләре белән уртаклаша. Үзенең белгәннәрен башкаларга да сөйли.

- Өч ел дәвамында маңгаема ботокс ясатам. Ботоксның Ксеомин дигәнен сайлыйм. Матдәләр алмашы яхшы эшләгәнгә күрә, ул миңа 3 айга да җитми. Ә кайбер кешеләр моның белән 1 ел буе йөрергә мөмкин. Ләкин аны еш ясатырга ярамый, чөнки, яшерен-батырын түгел, бу - мускулларны катыра торган агу. Шуңа күрә мин аны елга бер тапкыр кадатам.

- Нәрсә бирә ул сиңа, Гөлназ?

- Мимиканы дөрес формалаштырырга ярдәм итә. Үз сөйләмемдә һәм бигрәк тә җырлаган вакытта маңгайны җыермаска өйрәндем. Хәзер маңгайдагы җыерчыклар күпкә әзәйде.

- Аның зыяны бардыр бит?

- Сүз дә юк, аның зыяны бар. Әмма мин аның файдалы ягы турында күбрәк уйлыйм. Табиблар әйтүенчә, ботокс ясатуның иң зыянсыз өлеше ул - маңгай. Ботокстан тыш, биткә массаж, фейсбилдинг ясатуны да хуплыйм.

- Битеңнең тагын кайсы өлешенә ботокс ясатасың?

- Бары тик маңгайга гына. Битнең башка өлешләренә ясатмыйм. Кемдер күз, борын, ирен тирәсенә ясый. Тик ул җирләрне бер кадатсаң, гел кадатырга кирәк. Шәхсән миндә 50-60 яшькә кадәр ул өлешләргә ботокс ясау теләге юк. Ботокс ясарга теләүче кызлар шуны аңласын иде: аны мимиканы дөрес формалаштыру максаты белән ясатырга һәм кирәкле нәтиҗәгә ирешкәч, башка ясатмаска кирәк.

Лена РӘХИМОВА