Игорь Дмитриев: «Бер күрүдән: “Ул минем хатыным булачак”, – дип уйлап куйдым...»

– Игорь, ихлас котлыйбыз. Тәкъдимгә озак әзерләндегезме? 
– Аделина белән бер ел диярлек очраштык. Бер күрүдән: “Ул минем хатыным булачак”, – дип уйлап куйдым. Әйтерсең, күңел: “Бу синең тиң ярың, синең кешең”, – диде. Тәкъдимне Вьетнамда ясаячагымны белдем, әмма кайчан һәм кайда икәнен тәгаен уйламадым. Анда матур җирләр күп бит. Балдакны үзем белән алдым да, җае чыккач, тәкъдим ясадым. Дөресен әйткәндә, “мин романтик” дип мактана алмыйм. Әмма Аделинага андый әйбер ошагач, тырыштым.

– Сөйгән ярыгыз белән дә таныштырыгыз әле.
– Аделина медицина өлкәсендә эшли. Медицина университетын тәмамлады. 7 нче поликлиникада терапевт булып эшли, моннан тыш косметология белән дә шөгыльләнә, балаларга химия, инглиз теле буенча онлайн-дәресләр үткәрә. Менә шундый күпкырлы шәхес.

– Игорь, гаилә коргач, фанатларым кимер дип курыкмыйсызмы?
– Минем иҗатымны яратучылар беркая да югалмаячак дип уйлыйм. Башка максатлары булганнар югалса да, борчылмыйм, чөнки мин тиң ярымны таптым. 

– Алга таба планнар нинди? Туй? Никах? Ярәшү?
– Әлегә төгәл әйтә алмыйм. Минем әни – татар, әти – керәшен. Аделинаның әтисе – татар, әнисе – урыс. Бу сорауга ачыклык кертмәдек әле. Ялдан кайткач, барысын уртага салып сөйләшәсе бар. Әти-әниләр безнең кавышуга бик шатланды, монысы иң мөһиме. Туй үткәрүне дә уйлап бетерергә кирәк. Ясагач, матур, сыйфатлы бәйрәм оештырасы килә. Ә андый мәҗлескә ныклап әзерләнергә кирәк.