#Шоу-бизнес 09 ноябрь 2025, 15:20

Илназ Минвәлиев: «Әнинең хәле бик мөшкел иде...»

09 ноябрь 2025, 15:20

«Гомере буе фермада, авыр хезмәттән башкасын күрмәгән, бил бөгеп эшләгән дә, эшләгән бит инде ул. Хиджама ясатырга алып бардым Казанга, үзе шулай теләде», ди җырчы

Скопировать ссылку

Илназ Минвәлиев: «Әнинең хәле бик мөшкел иде...»

Җырчы бу арада Казан юлын таптарга мәҗбүр. Хәер, туган авылы белән ике арадагы юлны болай да көндәлек урый бугай иде инде ул. Авылда яшәүче әнисен кайгыртып яшәве сокландыра, социаль челтәрләр аша җырчы яшәешен, туган якка кылган сәфәрләрен гел яктыртып бара – йорт-җирен дә тәртиптә тоталар, әнисе Разыя апаның үзен дә хәсиятлиләр.
– Әнинең хәле бик мөшкел иде. Билем дип зарланды. Гомере буе фермада, авыр хезмәттән башкасын күрмәгән, бил бөгеп эшләгән дә, эшләгән бит инде ул. Хиджама ясатырга алып бардым Казанга, үзе шулай теләде. Мин аны файдалы нәрсә дип тә әйтмим, яманламыйм да, башкалар безгә ияреп кабатламасыннар, ләкин әнигә файдасы тия. Аллаһка шөкер, кызлар җитезлеген куып тота алмаса да, өйдә ипле генә йөреп тора, әйбәтләнеп китте, күз генә тимәсен. Әнине Казанга алып килгәч, матур җирләрне күрсәтмисеңмени инде?! Үзе дә Казанны өстән күрәсем килә дип әйтә иде, алып менеп киттем 25 нче катка, – ди җырчы.

25 кат дигәне Казан үзәгендәге бик кыйммәтле кунакханәдә урнашкан. Дөресен әйтергә кирәк, бик байлар гына йөри торган ресторан.
– Җәннәт – әниләрнең аяк астында, дигән сүз минем йөрәгемә язылган. Әнине болай да хөрмәтләп яшим анысы. Казанда бик кыйммәтле ресторанга алып керү теләгем бар иде, әнине шатландыргач, үземә бик рәхәт, аларны кадерләү безнең бурыч бит, менә исә шуны үтәдем дип саныйм, шөкер. Ул ресторанда бик байлар, депутатлар, җитәкчеләр генә кереп туклана, чынлап та бер чынаяк чәең дә ат бәясе. Булса булыр, минем әни аннан да кыйммәтрәк дип, әнине алып кердем. Әнинең куануы! Бик хуш булды. Өстән караганда Казанның матурлыгы! Гөрләшеп чәй эчтек, тамак ялгадык та, кайтып киттек. Юл буе изге теләкләрен теләде. Әни кешенең баласына теләгән теләге һичшиксез кабул була, әниләрнең изге догасы белән гомер итсәк иде, – ди җырчы.

Кызыклы яңалыкларны күзәтеп бару өчен безнең МАХ каналына кушылыгыз.