«Каблуктан төшмичә генә, заманча әби булырга планлаштырам...»

- Киләчәктә җырчы буларак онытылудан курыкмыйсызмы?

- Курыкмыйм, чөнки мин – үз-үземә продюсер. Яшерен-батырын түгел: эстрадада өстенлектә тору өчен бик күп чыгымнар таләп ителә. Шул ук ротация, җырлар яздыру, клиплар төшерү берсе дә бушка түгел.

- Яшь артистка эстрадага кереп китер өчен, акчалы булу мөһимме, әллә талантлы булу мөһимрәкме?

- Әлбәттә, талантлы кешеләр шактый, ләкин моңа өстәмә акчагыз да булса, алай җайлырак. Һәрнәрсә акчага теркәлгән, шуңа бүгенге көндә яшь артистларга эстрадага чыгуы авыр.

- Үзегез ничек кереп киттегез бу өлкәгә, бәлки элемтәләр булгандыр?

- Элемтәләр минем беркайчан да булмады. 2013 елда үземнең акчам, дөресрәге, иремнең акчасы белән беренче адымнар ясалды. Ротацияләр күбәйгән саен проектларга чакыралар. Алга таба хит-парадларда катнашып, җиңүләр яуласаң, сине премияләргә чакыралар. Кыскасы, бу бер-бер артлы үрелеп бара торган процесс.

- Медиа кешесе буларак социаль челтәрләрне дә еш алып барасыз. Йолдызлык чире белән авырдыгызмы?

- Минем беркайчан да йолдызлык чирем булмады, чөнки һәрбер җиңүемә зур көч куелган.

- Интернетта гел шәхси тормышыгызны чагылдырып, күз тиюдән курыкмыйсызмы?

- Социаль челтәрләрдә хәзер күбрәк иҗатымны урнаштырам. Элек даими гаилә тормышын куя идем. Тора-бара әлеге якны яптым, чөнки бөтенесен дә халыкка күрсәтеп бетерергә ярамый.

- Йолдызнамә буенча сез арыслан икән. Аның үзенчәлеге шунда ки, үзен лидер итеп тоярга күнеккән. Сез дә шундыйларданмы?

- Лидерлыкны балачактан ук яратам. Эшемдә дә үземне алдагы позициягә куярга ияләшкәнмен.

- Алайса гаиләдә кем баш?

- Тормыш иптәшем—кучкар. Икебездә дә лидерлыкны яратсак та, мин хатын-кыз буларак аңа юл бирәм. Әйтәләр бит: хатын-кыз муен булса, ир-ат – баш дип. Менә безнең дә шулай.

- Лилия, бер дә үзгәрми торасыз. Сере нидә?

- Мин тормышка гашыйк. Тормыш белән канәгать, үпкәсез булсаң, бу берничек тә фигурага зыян китерми. Әлбәттә, спорт һәм диета хакында да истә тотарга кирәк. Аллаһка шөкер, үземне бәхетле дип саныйм.

- Косметология чараларына мөрәҗәгать иткәнегез булдымы?

- Гомеремдә бер тапкыр иренемне кабарттым һәм күз җыерчыкларын алдырттым. Бүтән берни дә эшләгәнем булмады.

- Озакламый олы улыгыз бәлки килен дә алып кайтыр. Сез әзерме бу этапка?

- Әйе, әзер. Иң әһәмиятлесе — акылы белән сайлаган яр булсын.

- Әби ролендә үзегезне ничек күзаллыйсыз?

- Бүгенге көндә социаль челтәрләрдә карасак, «әби» дигән төшенчә ул — яшь матур хатын-кызлар. Шәхсән үзем каблуктан төшмичә генә, заманча әби булырга планлаштырам.

- Сезнең приоритетларыгыз нинди?

- Һичшиксез, гаилә беренче урында. Иремнең, балаларымның янәшәдә булуы минем өчен мөһим. Шул ук вакытта эстрададан башка, төп эшем дә бар. Бишенче ел рәттән күчемсез милек сораулары белән шөгыльләнәм. Иҗатымны да игътибарсыз калдырмыйм.

- Лилия, әңгәмә өчен бик зур рәхмәт!

- Үзегезгә дә рәхмәт!

Алинә Фәхретдинова