Күзләре күрмәсә дә иҗат итә: Дәниф Шәрәфетдинов бүген ничек яши

Нәрсә дисәк тә, эксклюзив иде алар. Шушы җырны Динар Шәрәфетдинов (Дәниф Шәрәфетдиновның улы) башкаруын ишеткәч, куанып куйдым. Иҗатлары яши икән. Динар үзе дә җыр сәнгате өлкәсендә төпле адымнарын ясый инде. Ул  Муса Җәлил опера һәм балет театрында хезмәт куя. 

– Сине күргән саен, Дәниф абыйның хәлен белешәм кебек. 
– Әтинең иҗатын, үзен хөрмәт итүче кешеләр булу сөендерә. Әтинең хәле шул бер килеш. Дөрес, күзләре күрми. Бары яктылыкны гына күрә. Аранжировкалар ясарга кыенрак. Әмма мин аның белән шундый горурланам, чөнки компьютерның нәрсә әйткәнен ишетеп кенә дә, эшләргә өйрәнде. Көннәр буе шуның белән шөгыльләнә. 

– Сезнең дуэтыгызны күрергә бик теләр идек...
– Әтинең ризалыгын ала алсам, бәлки, берәр кайчан булыр.

– “Татар җыры”нда быел әтиеңнең җырын башкардың. Башка җырларын да яңартырга теләмисеңме?
– Мин беренче тапкыр үзем генә, сольный җырчы буларак “Казан Экспо”да чыгыш ясадым. Тамашачылар шундый җылы кабул иттеләр. Әти иҗатының давамчысы булуыма шатланам. Әлбәттә, эстрада өлкәсендә дә үсеш аласы килә. Әмма әти иҗатка бик таләпчән, катгый карый. Аның җырын яңартканда да диктофонга яздырып, тыңларга җибәрдем. Үз киңәшләрен бирде, “велосипед уйлап тапмаска” кушты, шуңа үземнән нәрсәдер өстәргә кыюлыгым җитми. Әтинең бар җырларын яңартып, бер альбом яздырырга уйлаган идем. Әлегә өлгерә генә алмыйм.

– Опера театрыннан китәргә теләмисеңме?
– Юк, мин операны яратам. Үземнең иҗат юлымны күбрәк опера өлкәсендә үстерәсе килә. Ә эстрада – әлегә шөгыль.

– Кайсы “дөньяда” кыенрак соң: операдамы әллә эстрададамы?
– Икесен дә җиңел дип әйтмәс идем. Операга килгәндә, һәрвакыт укырга, өйрәнергә кирәк, чөнки син язылган әсәрләрне ятлап, аларны җиренә җиткереп башкарырга тиеш. Ә эстрада җырчысының тормышы – көрәш. Һәрвакыт яңа җыр чыгарырга, костюм тектерергә, концертлар оештырырга кирәк, шуңа бер юнәлешне генә аерып күрәсәтә алмыйм. Бары тик кемдер – опера, ә кемдер – эстрада өчен яратылган.