Лилия Җиһаншина: «Рәсми рәвештә атказанган артист»

— Татарстанның атказанган артисты исемен алу — зур дәрәҗә, көтеп алынган бүләк. Туганнан бирле иҗатта кайным дисәм дә, буладыр. Экспедицияләрдә йөреп, бик күп материал тупланды. Онытылган халык җырларын яңартып, тамашачыларга җиткерәбез. Март аенда ук исем бирелү турында указга кул куелса да, бу хакта беркемгә дә әйтмәдем. Рәсми рәвештә бүләкләү тантанасын көттем.

Бер көнне бүләкләү тантанасына чакырдылар. Әле аңламыйча, аптырап калдым. Дәүләт бүләге булгач, бик сөендем, әлбәттә. Хәзер инде рәсми рәвештә атказанган артист. Бу — бик зур җаваплылык. Республика җитәкчелеге иҗатыма бәя биргән дигән сүз. Алга таба да халык иҗатын танытырга тырышырмын.

— «Зәкәрия» фольклор төркеменең бүген нинди яңалыклары бар?

— Төркемгә 2027 елда — 10 ел була. Зур планнар корам. Яңа состав кызлары белән концерт оештырасы килә. Быел Казан Мэриясенең «Үз телем» грантлар бәйгесендә катнашып, күпмилләтле альбом яздыруга грант оттык. «Бердәм» дип исемләнгән 7 милләт җырларын туплаган альбом әзерлибез. Барысы да экспедицияләрдә табылган, буыннан-буынга күчеп килгән халык җырлары. Инде беренче җырыбызны яздырырга әзерләнәбез. Шулай ук җәен Чувашиядә музыка фестивалендә катнашып, җиңү яуладык. «Подружки» дигән җырыбызга клип төшерәчәкбез.