Лилия Хәйруллина: “25 сәгать булса да, җитмәс иде, мөгаен” яки җырчылар бу көздә ниләр эшләп өлгермәгән?

Салкын ел фасылына аяк бастык һәм ниһаять, кар яуды! Бүген узып киткән көзгә нәтиҗәләр ясарбыз һәм кышка планнар корырбыз. Яраткан җырчыларыбызның көзгә дигән бөтен планнары да үтәлгәнме? Ниләр эшләп өлгермәгәннәр? Кышка нинди төп максатлары бар һәм, гомумән, бу ел фасылын яраталармы алар? Кыскасы, барысын да белештек!

“Мин план буенча яшим. Бүгенге эшне иртәгегә калдырырга яратмыйм, чөнки ахырдан авыр булырга мөмкин. Һәр эшнең үз вакыты бар. Көзгә дигән барлык максатларым да үтәлде. Кышка килсәк, карлы, җылы кышны яратам, әлеге фасылга да зур планнар бар”,– дип бүлешә Фирүзә.

 “Бөтен ел фасылы да үзенчә әйбәт, матур. Һәрбер кеше үзенә планнар уйлап куядыр ул, безнең да андыйлар бар иде. Көз көне барына да өлгердек, шөкер. Кышын да иҗади эшләр дә, башка төрлеләре дә күп, әмма артык грандиоз планнар юк үзе”,– дип бүлеште Ландыш Нигъмәтҗанова.

“Гомумән алганда көзгә дигән планнарны үтәп өлгердем бугай. Тик тагын да күбрәк акча эшләп өлгермәдем, кызганыч”,– дип елмая Аиша һәм көзен эшләп өлгермәгән акчасын салкын ел фасылында эшләп өлгерергә максат куюын да ассызыклый. “Кышны мин аеруча яратам. Аклык-сафлык бар дөньяда. Искиткеч”,– дип бүлешә җырчы.

“Аллага шөкер, көзгә дигән барлык уй-ниятләр дә үтәлде. Барысын да эшләп өлгердем. Тыныч күңел белән кышка кердем”,– дип бүлешә Гүзәл Салаватова. “Кышка төп максатым – банкет, корпоративлардан исән калу. Бөтен чараларны 100 процент башкарып, тормыштан ләззәт аласы, тау шуасы, шәһәр читендә ял итәсе килә”,– дип хыяллана салкын фасылны яратучы, 5 гыйнварда туган Гүзәл.

Кызганыч, әмма Ландыш Баһави көзгә куелган бөтен планнарын да үтәп бетерергә өлгермәгән. “Хәрәкәт җитеп бетмәде. Бигрәк тә иҗат өчен. Иҗатның да пунктлары бик күп бит: күлмәк тектерү, җырлар сайлау, аранжировка яздыру, концерт программасын төзү һәм башкалар”,– дип тезеп китте җырчы. “Көз муллык фасылы булгач, яшелчә, җиләк-җимешләргә дә вакыт күп кирәк: кайнатма, компот, салатын да ябасың. Балалар-оныклар янында да күбрәк буласың”,– дип йомгаклый җырчы.

Нияз Хаматшин быел дачадагы агачларын ябып өлгермәгән булып чыкты. “Һава торышы болай торгач, кар яумагач, алар өшер дип куркып йөрим хәзер. Сәнгать ягыннан исә барына да өлгердем. Кышка артык зур максатлар юк, тик бераз булса да ябыгырга иде. Иртән чаңгыда шуарга, кичен су коенырга, йөзәргә, артык авырлыктан котылырга кирәк”,– дип кышка планнары бн бүлеште Нияз.

“Көз көне эшлим дип куелган грандиоз планар юк иде. Барысы да үз агымында барды. Розаларымны җиргә яткызып, бәйләп куярга өлгермәдем менә, әле искә төште”,– дип башлады җавабын Зәмирә Рәҗәпова. “Кышка планнар артык юк. Әле шушы көннәрдә өйгә клининг чакырттым, яңа ел алдыннан шәпләп җыештырып алу гадәте бар бездә”, - дип бүлешә җырчы.

“Көзгә куелган бөтен планнарны да башкарып чыгып булмады, гел вакыт җитми. Тәүлектә 25 сәгать булса да, җитмәс иде, мөгаен. Мин бит әле 4 тапкыр әни кеше, шуңа бар җиргә дә өлгереп бетеп булмый”,– дип фикере белән бүлешә Лилия Хәйруллина.  “Кышны, карны аеруча көтәм. Сагындырган. Бер елны, гомумән, чит илдә уздырдым бу салкын фасылны. Карны бик сагынган идем”,– дип бүлешә планнары турында сөйләргә түгел, ә эшләргә яратучы җырчы.