Лилия Хәмитова: “Ноябрьдә кибет минуска китте...”

Мал дигәндә, шөкер анысы, җырчылар икесе дә шактый мал-мөлкәт туплап, аякта нык басып торган хәлләрендә кушылдылар. Инде уртак бизнеска керешү – тормышларының яңа этабында югарырак баскычларга күтәрелү иде. Ләкин гөрләп эшләп торган кибетләрен яптылар...

Хәтерләсәгез, Винарис белән Лилия кибет ачканнар иде. Казан үзәгендә. Киемнәрне дә чит илдән кайтарттылар. Җырчы халкы да су кебек агылды ул кибеткә, билгеле шәхесләр дә эзне суытмады. Шуңа да карамастан, кибет урнашкан бүлмәне бушаттылар. Сәбәпләрен белер өчен Лилиягә шалтыраттык. Ни дисәң дә, сәүдәне бүгенге көндә ул алып бара әле, кибетнең бар мөлкәте белән ул Арчадагы болын кадәр йортына күченде. Әйе, өйдә сату итә.
– Эшләп карамый гына ялгышмыйсың, һәр тармакта шулайдыр инде, аяк чалырлык нечкәлекләр күп... Аренда бәясен күтәрделәр. Аена 250 мең сум түләргә тиешбез. Без аны кибет кереме белән генә түли алмый башладык. Аңа кадәр аренда бәяләрен кибет кереме күтәрде әле, зарлана алмыйбыз. Соңгы айларда халыкның да кибеткә керүе кимеде. Моның да үз сәбәпләре бар, парковкасы юк бит, машинаны кая куярга белмичә аптырыйсың. Ноябрь аенда кибет беренче мәртәбә минуска китте. Декабрь аенда ташламалар ясап, без сатуны күтәрдек. Юк, болай булмый, диде Винарис, сату минем эш түгел, ашау-эчүгә бәйле бизнес күңелемә якынрак дип, ул бизнес эшчәнлеген бер карары белән үзгәртте, – диде Лилия шалтыраткач. 

Әлбәттә, ул көннәрне җиңел генә кичмиләр. Борчу, кайгыру, бизнеска салган акчаның януы, керемне кайтарып бетерәсе килү теләге тынгы бирми аларга. Йокысыз төннәр дисеңме.. Андый чакта сынарга бер адым кала.
– Мондый хәлдә ирләр дә сына, ләкин Винарис янында мин бар бит, мин! Бар сүзне уртага салып сөйләштек, икәү серләштек, кара-каршы сүзсез генә утырып торган чакларыбызда да ялгыз түгеллекне аңлар өчен янәшә сулай җитте. Мин бөтен киемнәрне алып, Арчадагы өемә кайттым. Тезеп куйдым, китте сату көйләнеп! Йортым зур, киләләр, иркенләп киеп карый алалар. Акчага алган товарны сатып та бетерергә кирәк бит, шуңа да 40 процент ташламалар ясадык. Кайбер киемнәрне мин Винариска әйтмичә дә 50 процент ташлама белән бирә алам, бу минем үз карарым, – ди Лилия ханым. 

Кибет ябылса да, Винарис анда икенче бер бизнес учагына утын өсти – лаунч-бар ачарга әзерләнә. Монда шәп кухня, вип заллар булачак, уен залы да көтелә. Хәерле булсын! Бизнес шундый нәрсә инде, я янасың, я батасың, я югарыга таба атлыйсың. Без исә җырлы гаиләгә уңышлар телибез.