Рәфис Калимуллин: “Чыгымнары 10 тапкыр артыграк буласа да, куркып калмадым”

Бу үзенчәлекле проект турында тулырак Рәфис Калимуллин белән сөйләштек. 
-  Кино төшерү идеясе ничек туды?   Син актер ролен генә үтәдеңме әллә идея авторлары рәтендәме? 
– Фильм төшерү турында “Якыным” җырына клип төшергәндә сүз чыкты.  Марсель Мәхмүтов: “Шулкадәр көчле шәп клип төшерәсең килсә, әйдә кино төшерәбез”,- диде. Аның чыгымнары 10 тапкыр артыграк буласын да белдем, әмма куркып калмадык. Бу фильмда мин продюсер ролен дә үтәдем. Кайбер урыннарны үзем уйлап таптым.

– Рузиль  белән эшләү ничегрәк булды? Уртак тел таба алдыгызмы? 
– Рузиль белән икебез дә Нурлаттан. Уртак танышларыбыз, элемтәләребез болай да бар иде. Бик җиңел, рәхәт эшләдек. Каршылыклар булды дип зарлана алмыйм. Әлбәттә, Россиякүләм танылган актер белән эшләүнең үзенчәлекләре бар. Аның үз таләпләре. Рузильнең проектта катнашуын яшерергә тырыштык. Шулай да белеп алучылар булды. Клуб янында әниләр балалары белән съемкалар башлануын көтеп тордылар. Без инде фотога төшәргә мөмкинлек бирдек. Бер баланың дулкынланудан куллары бик нык калтырады. Аны тынычландырырга тырыштык. 

– Фильмда сүгенү сүзләре кергән мизгелләр дә бар.  Каршылыклар тудырмасмы халыкта? 
– Көндәлек тормышта да халык сүгенү сүзләрен куллана. Фильм комедия жанрында, без гади тормышны күрсәтергә тырыштык.  Сүгенү сүзләрен тавыш белән капладык, яшь чикләве 18+ тамагасын да куйдык. “Бу фильм ник кирәк соң инде. Түккән акчаларын да каплый алмаячак”, - дигән сүзләр күп булды. Әмма без уникаль продукт ясадык. 

– Бу беренче актерлык тәҗрибәңме? 
–  Клипларымда үзем төшәргә тырышам. Критиклар да, журналистлар да артыгын кыланып ташламадың дип әйтте. Үземә уйнаган ролем ошады. Дөрес, бу  минем өчен үзенчәлекле тәҗрибә. Режиссерлар, сценарий авторлары да фильмда катнашты. 

– Съемкаларда кызыклы хәл булдымы? 
– Кызыгы да, кызганычы да булды. Съемкалар иске клубта узды. Аны утын ягып җылытырга кирәк. Бер көнне бинада салкынчарак иде, ике яктан да ишекләр дә ачык торды. Съемкалардан соң Ижевскийга чыгыш ясарга киттек. Биш җыр башкарганнан соң, калтырата башлады. Төркемемдә эшләүчеләр кайнар чәйләр ясап, курткаларга төреп куйдылар. Съемкалар тәмамлангач,  бик каты авырдым. Тәүлек буе урын өстендә саташып яттым.