Сәхнәдән тыш алар нәрсә белән шөгыльләнә? Татарстан артистлары үзләренең мавыгуларын сөйләде

ИлСаф, Татарстанның халык артисты:

— Малайлар агач-таш эшләренә тартыла бит инде ул. Мәктәп елларында сыерчык оялары ясарга ярата идем. Такта кисәкләреннән түгел, ә куыш агачтан ясадым, куыш агачның эчен чистартуга гына да бер атна уза иде. Сыерчык оясын хәзер дә ел саен диярлек ясап куярга тырышам.

Балаларда табигатькә, кошларга карата мәхәббәтне кечкенәдән үк тәрбияләү кирәк, дип саныйм. Мин кайчакларда үземне «гармунчы» сыйфатында да хис итәм. Күңел юанычы өчен гармунда уйнап куйгалыйм. Гармунны 6нчы сыйныфта укыган чакта «елап» дигәндәй сатып алдырткан идем.

Дилә Нигъмәтуллина, Татарстанның атказанган артисты:

— Рәсем ясарга хәвәслегем бар. Мәктәптә укыганда күп ясый идем рәсемнәрне: табигать күренешләрен дә, җәнлекләрне һәм кошларны да. Студент елларында бу мавыгу кими төште, хәзер мавыгу бөтенләй туктады. Сәхнә, гаилә мәшәкатьләре белән рәсем ясауга вакыт җитми. Ләкин, табигатьтән салынган сәләт югалмый, рәсем ясый алам. Бүген мин — «укытучы», бала белән дәрес әзерлибез.

Гөлназ Шәрипҗанова, җырчы:

— Кечкенә чактан ук тегүче һөнәре күңелемә якын. Мәктәптә хезмәт дәресләрендә кызлар белән алъяпкычлар тегә идек. Шактый матур килеп чыга иде, өйдә дә энә белән тегеп утырганнарым булды. Хәзер алай иркенәеп, тегеп-чигеп утырганым юк. Балалар белән мәш киләбез, киемнәренең ертылган-сүтелгән урыннарын үзем төзәтәм. Балаларга аш-су әзерләү, вак-төяк эшләрне башкару тәртипләрен өйрәтергә исәп, Аллаһы боерса.

Илсур Шәрипҗанов, җырчы:

— Авылда үскән кеше буларак, миндә төзүче, терлекче, бакчачы һөнәрләренең өлешләре бар инде ул. Өйдә көчтән килгән төзү-төзекләндерү эшләрен үзем башкарам. Ярдәмче кирәк очракларда Гөлназга дәшәм, аның фикерләрен искә алам. Миннән «хоккейчы» да чыккан булыр иде, бәлки. Хоккей уйнарга яраттым, хәзер дә боз сараена баргалыйм. Балаларны һөнәр түгәрәкләренә, спорт секцияләренә йөртү яхшы — тормышка әзерлектә үссеннәр.