Татар шоу-бизнесында яңа гауга. Гөлнара Тимерҗанова: «Бу җырның җырчысы мин генә»

Бу юлы сүз Татарстанның атказанган артисты Гөлнара Тимерҗанованың "Мәхәббәт ялкыны" җыры турында. Аның буенча "чын ялкын" кабынды, әмма бик үк "мәхәббәтле" түгел. Яшь җырчылар Вилли (Вильдан Шәмсетдинов) һәм Рүзилә Бәдертдинова бу җырны яңартып дуэт яздырганнар. Социаль челтәрләргә шушы җырга видео төшереп тә урнаштырганнар. Бер язманың астында без Гөлнара Тимерҗанованың да комментариен күреп алдык. "Судка претензия әзер" , – дигән иде ул. Бәхәскә ачыклык кертер өчен Гөлнара Тимерҗанова белән хәбәргә чыктык. 

– Бервакыт Рүзилә дигән кыз минем белән хәбәргә чыкты, – дип башлады җырчы сүзен.– Җырны башкарырга рөхсәт сорады. Миңа еш кына җырның фонограммасын сорап һәвәскәр җырчылар мөрәҗәгать итәләр. Мәҗлестә җырлыйлар, аерым бер концертларда башкаралар. Рүзилә дә шундый ук сорау белән чыкты дип уйладым. Башта рөхсәт иттем, аннан сәбәбен белешеп бетерергә булдым. "Җырны яңартып, клип төшерәбез", - диде. Мин рөхсәт бирмәдем! Бу җыр нәкъ минем тавышка, минем өчен язылган. Фәнис абый Яруллинга барып, хәләтемне сөйләп, шундый шигырь язарга сорадым. Әгәр мин Фәнис абыйга бармаган булсам, бу җыр тумас иде дә. Бу үзе бер хокук инде. Җыр исключительный правага бирелмәгән. Бу җырның җырчысы мин генә. Үзем гомеремдә дә кеше җырына кагылмадым. Аллаһка шөкер, үземнең җырларым гел популяр булды. Кеше җырына кагыласың икән, димәк, сәләтең, көчең җитеп бетми. Барысы да кеше җырын алып тиз генә күтәрелеп китмәкче булалар. Юк, алай булмый. 

– Судка барасызмы? 
– Бу җырны музыкаль мәйданчыклардан алып, гафу үтенсәләр ахыры хәерле булыр иде. Әмма алар эшне дәвам итәләр. Мин бит әле дә актив иҗат итүче җырчы, бу җырымны көн саен диярлек башкарып торам. Җырны урамнан эзләп тапмадым бит. Аны Татарстанның халык язучысы Фәнис Яруллин иҗат итте. Ул мине бик якын күрде, безнең дуслык әти-кыз дәрәҗәсендә иде.  Моны белә торып, ярамый дип әйткәч тә, җыр чыгару оятсызлык инде бу. Алай ярамый һәр кешенең үз йөзе булырга тиеш.