Татар җырчылары төрек җырчысы белән дуэт башкара

Сәйдә Мөхәммәтҗанова белән Данир Сабиров Рафет эл-Роман белән төрекчә дуэтлар башкарды. Рафет әл-Роман танылган мәхәббәт балладалары башкаручысы. Аның җырларын хатын-кызлар аеруча үз итә.

Сәйдә Мөхәммәтҗановага Төркиянең Татарстандагы консуллыгыннан шалтыратып әлеге җырчы белән дуэтта җыр башкарырга тәкъдим иткәннәр. Сәйдә сүзләренчә, җырны ул үзе сайлап алган. “Мин Рафет бәйнең иҗатын инде мәктәп елларыннан ук белә идем. Аның репертуарыннан “Kalbine Surgun” (татарчага “йөрәгеңнән сөрелгән” дип тәрҗемә ителә) җырын аеруча яратам һәм шушы лирик композицияне дуэтта башкарырга уйладык!” – диде Сәйдә.

- Беренче тапкыр халыкара дәрәҗәдәге җырчы белән чыгыш ясадым. Концерт башланганчы Рафет әл-Роман белән сөйләшкәндә мин башта аның белән дуэт җырларга, аннан үземнең җырларымны башкарырга тәкъдим иткән идем. Әмма Рафет әфәнде киресенчә, башта миңа үземнең җырларымны башкарып, аннан аны сәхнәгә чакырып, бергә дуэт җырларга тәкъдим ясады. Бу тамаша югары дәрәҗәдә узды. Киләчәктә мин дә Төркиядә үземнең концертымны оештырырмын дип ышанам, - ди Данир.