«Җыр бары тик Гөлнара Тимерҗанова белән генә башкарылачак. Иске видеоязмалар истәлеккә кала инде...»

Без бу хакта язган идек. Укырга: Татар шоу-бизнесында яңа гауга. Гөлнара Тимерҗанова: «Бу җырның җырчысы мин генә». Җырны рөхсәтсез яңартып яздырган өчен: “Судка претензия әзер”, - дигән иде Гөлнара Тимерҗанова. Шулай да, эш судка кадәр барып җитмәгән. “Мәхәббәт ялкыны” җыры Вилли (Вильдан Шәмсетдинов) һәм Гөлнара Тимерҗанова башкаруында барлык музыкаль мәйданчыкларда пәйда булды. Бу хәлгә ачыклык кертү өчен Вильдан Шәмсетдинов белән хәбәргә чыктык.
- Эш судка кадәр барып җитмәде, шөкер. Суд процессы башланганчы, рәсми хатлар юлланырга тиеш. Без хәтта ул этапка да җитмәдек, Аллаһка шөкер. Гөлнара апа белән күрешеп, күзгә-күз карап сөйләштек. Гөлнара апаның командасы, юристлар белән аңлаштык. Мин бит үземне хаклы дип әйтмим. Әлбәттә, гаебем бар. Бар нечкәлекләргә төшенмичә, җыр яздырдым. Гөлнара ападан гафу үтенеп, 100 процент аңлаштык. 

- Авторлык хокуклары турында белешмәгән идегезме?
- Бу җырга дуэт яздырырга дустым Ильмир Әзгамов тәкъдим итте. Ул Рүзилә белән бергә эшли иде инде. Мин уйлап та тормадым, ризалаштым. Җырга хокуклар турында белешкән идек, әмма, күрәсең, төгәл мәгълүмат булмаган. Гомумән, без бу җырны чыгарыргамы дип икеләндек. Чөнки тагын бер яңа җырыбыз бар иде. Нишләптер, “Мәхәббәт ялкыны” күңелгә ныграк ятты. Анысын беренче чыгарырга булдык. 

- Димәк, Рүзилә Бәдертдинова белән яздырган җыр турында онытабыз?
- Җыр бары тик Гөлнара Тимерҗанова белән генә башкарылачак. Иске видеоязмалар истәлеккә кала инде. “Шундый хәлләр дә булды бит әле”, - дип искә алырбыз әле бер.

- Халыкны борчыган тагын бер сорауны да бирәм. Социаль челтәрдә Гөлназның һәр язмасы астында диярлек: “Вилли белән аерылыштыгызмы әллә?” - дип сораучы бар. Ачыклык кертсәгез иде.
- Үз көебезгә әкрен генә яшәп ятабыз. Концертлар вакытында гына аерылышабыз. Аерылышабыз да, кире кавышабыз (көлә). Минем дә чыгышларым бар. Без бит икебез ике төрле юнәлештә эшлибез. Ул үзенең иҗаты өстендә эшли, мин үземнеке өстендә. Бу хакта күптән сөйләштек, килештек. Барысы да яхшы, борчылмагыз.