Җырчылар разведкага үзе белән кемне алыр иде?

Илгиз Хәсәншин, җырчы: Танк та, снайпер винтовкасы, граната да була алмас идем. Миңа күбрәк пулемет туры килә. Пулемет күп һәм тиз ата. Мин дә пулемет кебек тиз, күп сөйләшәм, әкрен сөйләшә алмыйм. Сәхнәдә дә тиз кеше мин. Сәхнәгә андый-мондый яшерен кораллар алып чыккан юк. Кемдер, мәсәлән, күз тимәсен өчен киемгә каптыргыч эләктерә. Мин “бисмилланы” әйтәм дә, Аллаһка тапшырып чыгам инде. Бөтен энергиябезне, гаиләбезнең җылылыгын тамашачыларга бирәбез. “Разведка”га мин бармас идем, дөресен әйткәндә, әгәр барырга туры килсә, үзем белән хәләлем Гөлзаданы алыр идем. Тормыш иптәше дип юкка әйтмиләр. Тормышта иң якын иптәш – хатын. Ышаныч аңа гына. Барлык дусларыбыз үпкәләмәсен иде. Гаилә дуэты булып җырлаучылар безне аңлар дип уйлыйм. Нинди генә хәл булса да, ир-ат ирлеген, батырлыгын, үҗәтлеген, үз йөзен югалтырга тиеш түгел. Миңа калса бу ирләр өчен бик мөһим. 

Әнвәр Нургалиев, Татарстанның атказанган артисты: Тавыш корал булса, бәлки, снайпер винтовкасы булыр иде. Төгәллекне яратам. Сәхнәгә чыгар алдыннан махсус коралларым юк, белгән догаларымны укыйм. Разведкага үзем белән улымны алыр идем һәм бер дустымны, аңа ышанып разведкага бара алам. Ирләр өчен иң мөһиме – чын ир булып калу. Бу сүзләргә барысы да керә: батырлык та, көч тә, хатын-кызга булган мөнәсәбәт тә. Элеккеге заманнарда рыцарьлар кебек затлы, намуслы булырга кирәк. Әлбәттә, ир-ат дөреслектән куркырга тиеш түгел. Астыртынлык, яшереп кенә ниндидер начарлык эшләү дә ир-егетне бизәми. 

Азат Абитов, Татарстанның атказанган артисты: Тавыш корал булса, “Орешник” ракетасы булыр иде. Бер сүз белән әйтсәк, көчле (көлә). Сәхнәдә төп коралым – ул минем тавыш. Разведкага Гөлсирин белән барыр идем. Ир-атлар өчен иң мөһим сыйфатлар – игътибарлылык, гаделлек һәм такт хисе, тәрбиялелек.