Җырчылар хатын-кызлар арасындагы дуслыкка ышанамы?

Күп кенә статистик мәгълүматлардан чыгып, хатын-кызлар арасында дуслык юк дигән фикергә килергә мөкин. Ә җырчылар ничек уйлый? Кемнәр яхшырак дус: хатын-кызлармы яки ир-атлармы? Бу сорауларга җавап таптык! 

“Хатын-кызлар арасында да, ир-атлар арасында да дуслык бар дип саныйм. Мисал өчен, мәктәпкә кергәндә үк аралашкан иптәш кызым белән әле булса җылы дуслык җепләрен кадерләп саклыйбыз”,– дип ассызыклый Аиша. “Дус авыр чакларда сизелә. Сыналган дуслык яклы мин. Гомумән, алганда якын дуслар күп түгел, шуңа аларын да сакларга кирәк”,– дип тә өсти җырчы.

“Төрле җенесләр арасында дуслык бар, әмма ул күп була алмый. Бер яки икәү булырга мөмкин, хатын-кызлар арасында бигрәк тә”,– дип сүз тотты Илсур Шәрипҗанов. Шулай ук гаилә башлыгы гүзәл затлар арасындагы дуслыкка ышанып та бетмәвен ассызыклый. “Хатын-кызлар көнләшә торганнардан”,– ди җырчы. 

“Хатын-кызлар арасында дуслык бар, ә менә хезмәттәшләр арасында эштә, сәхнәдә чын дуслыкка ышанмыйм, биредә иптәшләр генә бар”,– дип сүз тотты Алсу Абульханова. Җырчы исә ир-атлар бн дус булуы җиңелрәк икәнен дә ассызыклый. “Күп еллар Зөфәр Хәйретдинов, Ринат Гәрәй һәм аларның гаиләләре белән якын дуслар без”,– дип бүлешә якын дуслары сирәк һәм чын булган җырчы.                    

“Аллаһка шөкер, хатын-кызлар арасында дусларым бар. Мин бик бәхетле. Хатын-кызлар гына бер-берсен аңлый, тормышка өйрәтә һәм илһамландыра ала. Нинди генә темага кагылсалар да, бер-берсенә киңәш бирә ала гүзәл затлар”,– дип сүз тотты Рәфинә Ганиуллина. Җырчы соңгы 3-4 ел эчендә “девичник”ларга йөрүен, дус кызлары белән тыгыз элемтәдә торуын да ассызыклый. “Кайларга гына бармадык, кадакларга да бастык, төрле психологик уеннар да уйнадык. Хатын-кызлар арасында энергия алмашы булырга тиеш”,– дип белдерә җырчы. 

“Безнең кызлар-пати оешмасы бар, биредә 20 якын коллегелар, җырчылар, кызлар җыелган.. Бер-беребезгә концертларга йөрибез, авыр чакта ярдәмгә киләбез, бергәләп ял итәбез. Хатын-кызлар “организоавнный” халык. Мисал өчен, без бәйрәмнәрне дә бергә уздырабыз. Ә ир-атларда мондый функция юк. Алар арасындагы дуслыкка бик ышанып та бетмим”,– дип белдерә Гүзәл Идрисова. 

Зинира Рамазанованың сәнгать кешеләре арасында түгел, әмма башка өлкәләрдә дус кызлары бар булып чыкты. Гомумән алганда, Ризат: “Дуслар юк, бар танышлар” дигән принцип яклы. “Бераз гына уңышка ирешсәң дә көнләшү пәйда була. Чын дуслар әле очраганы юк. Без Зинира белән бер-беребезгә иң тугры дуслар”,– дип ассызыклый Ризат Рамазанов.