Җырчыларның яңа ел яллары ничек узган?

Гомумән, ял итеп өлгергәннәрме? Шул турыда белештек.

Ризат Рамазановның ял итеп ятарга вакыты булмаган. “Өчесеннән алып унысына кадәр районнарда концертлар белән йөрдек. Хәзер исә, кызганыч, гаилә белән авырып киттек, салкын тиде. Группабызны да читләп узмады, башта ротавирус эләктергән идек, тизрәк тернәкләнергә тырышабыз”, – диде җырчы. “Өйдәге чыршыны да сүтмәгән әле, вакыттыр инде. Аны сүтәрлек тә хәл юк (көлә)”, – дип өстәде Ризат. 

Яшь башкаручы Хәяткә дә, ни кызганыч, яңа ел яллары тәтемәгән булып чыкты. “Яллар булмады дисәм дә була, чөнки икенче гыйнвардан концертлар белән гастрольгә чыгып киттек. Гомумән әйткәндә, ял итәргә бик яратмыйм, актив тормыш белән яшим”, – дип елмайды җырчы.
“Яллар бик күңелле узды, – дип сүзен башлады Гүзәл Идрисова. – Чаңгы, тимераякта шудык, мунча кердек, карда аунадык, чанда йөздек... Кыскасы, сәламәтлекне кайгыртудан башлап җибәрдек яңа елны. Барына да өлгердек кебек инде, хәтта шәһәребезнең матур чыршыларын карадык, шугалакларга бардык, авылларда бәйрәм концертлары да куйдык. Каникуллар бик озак һәм рәхәт булды, әкренләп кенә эш “колеясына” кереп барабыз, балалар авырлык белән генә укырга китте. Бер карасаң, моның кадәр яллар бик күп тә булгандыр”.

Әнвәр Нургалиев яңа елны гадәттәгечә якыннары, туганнары белән каршылаган. "Яңа ел – ул гаилә бәйрәме. Ялларга килгәндә, бик җитәрлек булды алар. Җанны һәм тәнне ял иттереп, бер атнага чит илгә барып кайтырга да өлгердек. Саулык аркасында ике ел ялга бара алмаган идек", – ди Әнвәр абый. Хәзер исә яраткан җырчыбыз яңа концерт программасы өстендә эшләвен әйтте,18 гыйнвардан командасы белән гастрольләргә чыгып китәргә җыена.

Нияз Хаматшин бәйрәмнәрне традиция буенча гаиләсе белән уздырган. "Яллар җитте, хәтта артып та китте сыман. Авырып алырга да өлгердем. Хәзер исә яңа көч-энергия белән яңа елдагы эш режимына кереп барыш, Шушы көннәрдә, мисал өчен, Казанда булып кайттым, яңа җыр әзерлибез", – дип бүлеште җырчы. 
"Яңа ел бәйрәме дә, яллары да әйбәт узды, – диде Лилия Хаснулова. – Ике як әти-әниләрнең дә хәлләрен белеп, кунакка кайтып килдек. Беләсезме, яллар артыгы белән җитте миңа, күп тә тоелды хәтта. Гади көнгә ни җитә! Сагынып көткән эш режимына, ниһаять, кереп киттек.

Аиша исә яңа елны иң кадерле кешеләре – әнисе һәм кечкенә кызы белән җылы, рәхәт мохиттә каршылаган. "Минем эш беркайчан да туктамады, ялларда да дистанцион рәвештә эшләдем. Гыйнвар башында күпләр ял итсә, минем өчен тәүлекләр икеләтә эш көннәре булып тоелды. Балалар бакчасы эшләмәгәч, кызымны да карап, эш мәсьәләләрен дә берьюлы чишәсе булды. Аңа карамастан, бик күп нәрсәләргә өлгердем", – диде җырчы.