Дачада “тыелган” үсемлек үстерсәң

Сорауга адвокат Марат Гайнуллин җавап бирә: 

– Әйе, Россия кануннары буенча кайбер үсемлекләрне үстерү тыела, чөнки аларда наркотик яки психотроп матдәләр бар. Бу исемлеккә, мәсәлән, Гавай розасы, мескалинлы кактус, зәңгәр лотос, мимоза хостилис, ипомея өч төсле, күрәзәчеләр шалфее, шулай ук эфедра керә.
Мондый үсемлекләрне үстергән өчен җаваплылык төрле булырга мөмкин:
— 300 мең сумга кадәр штраф яки ике еллык керем күләмендә штраф;
— мәҗбүри эшләр (480 сәгатькә кадәр);
— ирекне чикләү яки хәтта 2 елга кадәр иректән мәхрүм итү.
Шунысын да исәпкә алырга кирәк: җинаять җаваплылыгына, гадәттә, үсемлекләрне күп итеп чәчеп үстергән өчен тарталар. Әмма бу кайбер үсемлекләргә кагылмый. Әйтик, мескалинлы кактусны хәтта 2 данә утырткан  өчен дә җаваплылыкка тартырга мөмкиннәр, ә кайбер башка үсемлекләр өчен — 10 һәм аннан күбрәк.
Шуңа күрә үсемлекне үстергәнче аның законлы булуын тикшерү мөһим.