Фатир ишеге каршына камера куярга ярыймы? Күршеләрнең рөхсәте кирәкме?

 Безнең подъездда соңгы вакытта чит кешеләр еш йөри башлады. Куркынычсызлык өчен фатир ишеге каршына видеокүзәтү камерасы урнаштырырга телим. Моның өчен күршеләрнең рөхсәте кирәкме? Камераны үз белдегем белән элеп куя аламмы?
Алсу. Казан.

– Бу сорау белән редакциягә мөрәҗәгать итүчеләр шактый. Бигрәк тә җәй җиткәч, күпләр дачаларга күчеп яши башлый, ә шәһәрдәге фатирларын күзәтү өчен видеокамералар урнаштырырга тели. Әмма һәр уңайлыкның үз кагыйдәсе бар. Күпфатирлы йорттагы баскыч мәйданчыгы, подъезд, коридорлар — уртак милек булып санала. Шуңа күрә анда видеокүзәтү җайланмасы урнаштыру күршеләрнең хокукларына кагыла. Бу хакта тәфсилләбрәк аңлатыйк. Әгәр камера уртак кулланылыштагы мәйданны төшерә икән, аны күршеләрнең ризалыгыннан башка урнаштыру канун бозу булып саналырга мөмкин. Күпләр: «Мин бит үз ишегемне генә күзәтәм», — дип уйлый. Әмма камераның күзәтү почмагына күрше фатир ишекләре, аларның килү-китүләре дә эләксә, бу инде шәхси тормышка кагылу булып бәяләнергә мөмкин.
Шуңа күрә белгечләр камера кую алдыннан шул катта яшәүчеләр белән сөйләшергә, аларның ризалыгын алырга киңәш итә.

Ризалыкны ничек алырга?
Иң дөрес юл бу мәсьәләне йорт белән идарә итүче компания яки торак милекчеләре ширкәте аша хәл итү.Әгәр камера урнаштыру турында уртак карар кабул ителә икән, бу язма рәвештә рәсмиләштерелергә тиеш. Мондый очракта киләчәктә бәхәсләр һәм дәгъвалар килеп чыгу ихтималы да кими.

Камера күршеләрнең ишеген төшерә аламы?
 Камера күршеләрнең шәхси тормышын күзәтү чарасына әйләнергә тиеш түгел. Әйтик, җайланма ярдәмендә күрше фатирының ишеге ачылган саен эчтәге хәлләр күренә икән, бу шәхси тормышка кагылу булып санала.
Канун буенча һәр кешенең шәхси тормышының кагылгысызлыгы гарантияләнгән. Шуңа күрә камера урнаштырганда аның төшерү зонасын дөрес көйләү мөһим.

Күршеләр каршы булса нәрсә була?
– Әгәр видеокүзәтү рөхсәтсез урнаштырылган һәм күршеләр моңа каршы икән, алар идарәче компаниягә, полициягә яки судка мөрәҗәгать итә ала. Мондый очракларда суд камераны сүттерергә мәҗбүр итәргә мөмкин. Кайбер хәлләрдә хәтта мораль зыян өчен компенсация дә түләтелә.

Камера куюның төп кагыйдәләре
Түбәндәге киңәшләрне истә тотарга кирәк:
* камера урнаштыру турында күршеләргә алдан хәбәр итегез;
* мөмкин булса, язмача ризалык алыгыз;
* камера күршеләрнең шәхси киңлеген төшермәскә тиеш;
* видеокүзәтү турында кисәтүче белдерү элеп кую файдалы;
* бәхәсле очракларда идарәче компания яки юрист белән киңәшләшегез.Видеокүзәтү йортны саклау өчен нәтиҗәле чара. Әмма куркынычсызлык турында кайгыртканда күршеләрнең хокукларын да онытмаска кирәк. Камера урнаштыру мәсьәләсендә ачыклык һәм үзара аңлашу булганда, конфликтлар да, суд юллары да кирәк булмый.

Онытмагыз: подъезд ул барлык күршеләр өчен дә уртак.