#Сорау-җавап 09 июнь 2018, 12:45

Көнбагыш ник җыелмый?

09 июнь 2018, 12:45

Узган ел республиканың күп кенә районнарында көнбагыш алынмый калды. Кар астында калган культураны күреп, озак вакыт күңел әрнеп йөрде. Быел да шулай булмасмы икән? Җылы ярата торган культураларны безнең республикада бөтенләй чәчмәскәдер бәлки? Илһам Мофаздалов, Спас районы.

Скопировать ссылку

Бу мәсьәлә республиканың авыл хуҗалыгы һәм азык-төлек министры Марат Әхмәтовны да борчый. Аның әйтүенчә, узган ел 120 мең гектар мәйданда чәчелгән көнбагышның 19 меңе җыеп алынмый калган.

– Әйе, көнбагыш һәрвакытта да уңышлы булмый шул, – диде ул безгә. – Җылы ярата торган культура узган елгы салкын җәйдә өлгерә алмады. Аларны җыеп алудан да мәгънә юк иде, чөнки кечкенә орлыкларны эшкәртүгә алмыйлар. Кукуруз белән дә шулай ук булды. Узган ел ул 3,5 мең гектар мәйданда калды. Ул кырларны мин үз күзләрем белән күрдем, күгәреп беткәнлектән, сугудан мәгънә юк иде. Ә чәчми хәлебез юк, чөнки без ассортиментны киңәйтергә бурычлы һәм мәҗбүр.

Соя культурасы да көнбагыш шикелле. Әгәр җәй җылы, уңышлы килеп, ул вакытында өлгерсә һәм әлеге культураны вакытында җыеп алып булса, бик яхшы. Ә башкача булса... Шуңа күрә аның мәйданнарын чикләнмәгән күләмдә арттырырга ярамый. Узган елгы кебек салкын җәй сояны өлгертми калдырырга да мөмкин. Соңгы елларда аерым хуҗалыкларда кечкенә генә мәйданнарда люпин культурасы игелә башлады, әлегә аның табышлылыгын санап караган юк. Шулай ук ул үзенә күрә аксымлы культура. Аны терлекләргә сөт күп булсын өчен ашаталар. Алдагы елларда аны киңрәк мәйданнарда чәчү уебыз бар.

Фото: pixabay.com

Кызыклы яңалыкларны күзәтеп бару өчен Т елеграмга кушылыгыз.