Тәмәке төтене өчен күршедән компенсация

Сорауга адвокат Марат Гайнуллин җавап бирә:

– Россиядә һәркемнең уңайлы яшәү мохитенә хокукы бар. Кеше үз фатирында яки балконында тәмәке тарта ала, әмма бу башкаларга комачауламаска тиеш. Күршенең гамәлләре аркасында төтен башка фатирга үтеп керсә һәм бу кешегә даими уңайсызлыклар тудырса, судка мөрәҗәгать итәргә мөмкин. Анда төтеннең керүен туктатуны һәм мораль зыян өчен компенсация түләүне таләп итәргә була.

• Балконда яки фатир эчендә тәмәке тарту үзе генә административ хокук бозу саналмый. Әмма подъезд, лифт, баскыч мәйданчыгы кебек уртак урыннарда тәмәке тарткан өчен административ җаваплылык каралган. Шул ук вакытта балконнан чыккан төтен күршеләргә комачауласа, алар үз мәнфәгатьләрен суд аша яклый ала.

Судта үз хаклыгыңны исбатлау өчен иң мөһиме төтеннең нәкъ шул күршедән килүен һәм сезнең хокукларыгыз бозылуын раслау. Моның өчен тәмәке тарту очракларын фото һәм видеога төшерергә, хәлне күргән шаһитларның аңлатмаларын алырга, идарәче компаниягә яки участок полиция хезмәткәренә язма мөрәҗәгать итәргә мөмкин. Шикаятьләрнең күчермәләрен һәм аларга килгән җавапларны да сакларга кирәк. Күрше төтеннең үзеннән килүен кире кагарга мөмкин.

Шуңа күрә мөмкин булган очракта тәмәке тарту фактын һәм аның нәтиҗәләрен теркәү аеруча мөһим.

Россия Гражданлык кодексының 151 нче маддәсе мораль зыян өчен акчалата компенсация билгеләү мөмкинлеген күздә тота. Ә 1064 нче маддә зыян китергән затның аны каплау бурычын билгели. Моннан тыш, 2013 елның 23 февралендә кабул ителгән 15-ФЗ номерлы федераль закон нигезендә, тиешле дәлилләр булганда, зыян күргән кеше судтан компенсация таләп итә ала. Әмма акчалата түләү автомат рәвештә билгеләнми: суд һәр эшне аерым карый, хокук бозуны, дәлилләрне һәм китерелгән зыянның характерын бәяли.

• Суд практикасы күрсәткәнчә, компенсация күләме эшнең шартларына бәйле. 2018 елда Россия Югары суды гомумиләштергән суд практикасында күршеләрнең тәмәке төтене башка фатирга үтеп керү белән бәйле эштә зыян күргән бала файдасына 5 мең сум компенсация билгеләнгән очрак китерелә.

Башта күршегез белән тыныч кына сөйләшеп карагыз. Нәтиҗәсе булмаса, идарәче компаниягә яки участок полиция хезмәткәренә язма мөрәҗәгать юлларга мөмкин.

Төтен керү дәвам итсә, дәлилләрне туплап, судка дәгъва бирү мөмкинлеген карагыз. Судтан төтеннең фатирга үтеп керүен туктатуны һәм мораль зыян өчен компенсация түләтүне сорарга мөмкин.

• Истә тотыгыз: күршенең тәмәке тартуын гына түгел, төтеннең сезнең фатирга үтеп керүен һәм хокукларыгызны бозуын да исбатларга кирәк. Нәтиҗә дәлилләрнең җитәрлек булуына һәм судның бәясенә бәйле.