«Теләгем юк, ә ирем басым ясый»: 47 яшьлек хатын-кыз соравына сексолог җавабы

Миңа 47 яшь. Инде бер ел җенси якынлык теләге юк. Моны кирәк тә дип санамыйм. Шуның аркасында ирем белән мөнәсәбәтләр бозыла. Бу ниндидер тайпылышмы? Кайсы табибка мөрәҗәгать итәргә? Үзем моның өчен борчылмыйм, ләкин ирем көн саен басым ясый, дәваланырга куша.
Исламия, Казан.

Сексолог Эльвира Гатауллина җавап бирә: 
Партнерга карата теләк булмау еш кына мөнәсәбәтләрдәге эчке киеренкелекне күрсәтә. Еллар буе җыелган үпкәләр, канәгатьсезлек, гаепләүләр, сөйләшеп бетерелмәгән мәсьәләләр – болар барысы да акрынлап либидоны киметә. Хәзерге хәл артык куркыныч булып тоелмаса да, вакыт узу белән ул тирәнәергә мөмкин. Бу үзара мөнәсәбәтләрдә генә чагылыш табып калмыйча, физик сәламәтлеккә дә йогынты ясавы бар.

Мондый очракта берничә юнәлештә эшләү файдалы. Беренчедән, психолог-сексолог белән эшләү эчке халәтне аңларга һәм партнер белән мөнәсәбәтләрне җайларга ярдәм итә. Икенчедән, үзеңә рәхәтлек китерә торган шөгыльләр табу мөһим: спорт, тән практикалары, яраткан эшләр эмоциональ халәтне яхшырта. Өченчедән, гормональ фонны тикшереп карау да артык булмас, чөнки тестостерон, эстроген, прогестерон, пролактин һәм окситоцин дәрәҗәләре дә либидога тәэсир итә.

Шулай ук теләк югалуга башка факторлар да йогынты ясый ала: стресс, борчылу, йокы режимы бозылу, сәламәт яшәү рәвеше булмау, партнер белән ачыктан-ачык сөйләшә белмәү. Болар барысы да җыелып, кешенең якынлыкка теләген чикләп куя.

Нәтиҗә итеп әйткәндә, секс – ул рәхәтлек һәм якынлык чыганагы. Әгәр мөнәсәбәтләрдә күп негатив тупланган икән, бу рәхәтлек табигый рәвештә югала. Гаиләдә ике кеше булган кебек, җаваплылык та икесенә дә карый: гаепле як юк, әмма мөнәсәбәтләр өстендә эшләү кирәк.

Яшь бару белән либидо кимү – табигый күренеш, ләкин бу якынлык һәм җылылык югалырга тиеш дигән сүз түгел.
Тема бик киңкырлы. Шуңа күрә һәр очракны аерым карарга кирәк. Психолог-сексолог яисә сексопатологка мөрәҗәгать итсәгез яхшы булыр.

Фото нейрочелтәр ярдәмендә әзерләнде