Хайваннарны теркәү — хуҗаларга җаваплылык өсти

Сорауга адвокат Марат Гайнуллин җавап бирә:

– Россиядә хәзерге вакытта халык өендә якынча 50 миллион мәче һәм 25 миллион эт тота. Дәүләт Думасы депутатлары 2026 елның 1 сентябреннән илнең барлык төбәкләрендә йорт хайваннарын мәҗбүри теркәүне гамәлгә кертү мөмкинлеген карарга әзерләнә.
Теркәлү «ВетИС» ветеринария өлкәсендәге федераль дәүләт мәгълүмат системасы аша башкарылыр дип фаразлана. Этне, мәчене яки башка йорт хайванын идентификацияләү өчен микрочип, бирка яки махсус кодлы муенса кулланырга мөмкин булачак. Бу ысулны хуҗа үзе сайлый.
Закон проектын ел ахырына кадәр карауга чыгару планлаштырыла.

Хәзерге вазгыять
Федераль дәрәҗәдә йорт хайваннарын мәҗбүри теркәү таләбе юк. Кайбер төбәкләрдә генә караусыз хайваннарны исәпкә алу, стерилизацияләү һәм тоту турында кагыйдәләр бар, ләкин барлык йорт хайваннары хуҗаларын берләштергән гомум илкүләм база әлегә эшләми.
«Ветеринария турында» Федераль закон авыл хуҗалыгы хайваннарын исәпкә алуны һәм маркировкалауды күздә тота, әмма ул йорт хайваннарына кагылмый.
Ни өчен депутатлар теркәлүне кирәк дип саный?
Бердәм база хайваннар санын, хуҗасын һәм аларның кайда булуын белергә мөмкинлек бирәчәк.

Теркәлгән хайванны урамга чыгарып ташлау авыррак булачак — хуҗаларның җаваплылыгы арта.
Ветеринария контроле, вакцинация һәм югалган хайваннарны табу процессы җиңеләя.
Агрессив хайваннар очрагында хуҗаны ачыклау да тизләшә.