Хезмәт кенәгәсендә хата киткәнме?

Адвокат Марат Гайнуллин үзенең киңәшләрен бирә. 
Хезмәт кенәгәсе – кешенең бөтен хезмәт юлын раслаучы төп документ. Андагы бер генә ялгышлык та киләчәктә пенсия рәсмиләштергәндә, эш стажын раслаганда яки яңа эшкә урнашканда җитди проблемалар тудырырга мөмкин. Хата табылды икән – нишләргә? Бу хакта юрист киңәшләрен тәкъдим итәбез.

Кайсы очракларда төзәтү кирәк?
Хезмәт кенәгәсендә түбәндәге ялгышлар булса, аларны төзәтү мәҗбүри:
эшкә кабул итү, күчерү, эштән азат итү турындагы язмаларда төгәлсезлекләр;
бүләкләүләр турында дөрес булмаган мәгълүмат;
фамилия, исем, атасының исемендә хаталар;
даталарда буталчыклык.
Мондый вак кына булып күренгән төгәлсезлекләр дә юридик яктан зур әһәмияткә ия.

Хатаны кем төзәтә ала?
Моны белү мөһим: хезмәткәр үзе хезмәт кенәгәсенә төзәтү кертә алмый. Үзгәрешләрне бары тик эш бирүченең вәкаләтле хезмәткәре генә кертергә хокуклы. Шуңа күрә хата тапсагыз, кичекмәстән кадрлар бүлегенә мөрәҗәгать итегез.

Төзәтүләр кертү тәртибе
Юристлар киңәше буенча, эш тәртибе түбәндәгечә булырга тиеш:

1. Хатаны ачыклау
Яңа язма кертелгәннән соң ук аны игътибар белән тикшерү кулай. Әгәр хата соңрак ачыкланса, вакытны сузмыйча эш бирүчегә хәбәр итәргә кирәк.
2. Төп документларны әзерләү
Төзәтүләр раслаучы документлар кирәк булачак: боерыклар, архив өземтәләре, рәсми белешмәләр.

3. Боерык чыгару
Эш бирүче төзәтү кертү турында аерым боерык чыгара. Бу – мәҗбүри шарт.

4. Язманы дөрес итеп төзәтү
Төзәтүнең үз кагыйдәләре бар: фамилия, исем, атасының исеме ялгыш язылган булса, иске язу бер сызык белән сызыла, янәшәгә дөресе языла. Яңа язма имза һәм оешма мөһере белән раслана.
Эшкә кабул итү, күчерү яки эштән азат итү турындагы хата “Эш турында белешмәләр” бүлегендә махсус тәртиптә төзәтелә: яңа юл номеры куела, төзәтүнең нигезе (боерык номеры, датасы) күрсәтелә, җаваплы хезмәткәр имзасы һәм мөһер куела.

5. Кирәк булганда – дәүләт органнарына хәбәр итү
Әгәр үзгәрешләр җитди характерда булса (мәсәлән, эшкә кабул итү яки эштән азат итү даталары үзгәрсә), Татарстандагы Дәүләт хезмәт инспекциясенә хәбәр итү таләп ителергә мөмкин.

Нәрсә эшләргә ярамый?
Катгый тыела:
Хезмәт кенәгәсенең битен яңадан күчереп язу;
“замазка”, корректор куллану;
иске язманы кырып яки башка механик ысул белән бетерү.
Мондый гамәлләр документны гамәлдән чыгарырга мөмкин.

Юрист киңәше

Барлык раслаучы документларның күчермәләрен саклагыз.
Төзәтүләр буенча боерыкларның копияләрен алыгыз.
Кадрлар бүлеге белән барлык мәсьәләләрне язма рәвештә хәл итү хәерле.

Лилия Гайнуллина әзерләде