“Балачагым күпфатирлы йортта үтте. Анда күзләре начар күргән кешеләр генә иде”

Ул ТИСБИ каршындагы “Мирас” волонтерлар үзәге, “Милосердие в образование” хәйрия фонды базасында “сәламәтлекләре чикле затлар белән эшләү буенча" волонтерлар хәрәкәте җитәкчесе. Бик теләсәң, бу җөмләне әле дәвам итеп була. Ә Румиләгә нибары 21 яшь.

– Волонтерлык хәрәкәтенә кайчан кушылдыгыз?
– Мин социаль волонтерлык белән шөгыльләнәм. Халыкның якланмаган катламнарына ярдәм күрсәтәм. Тормышым үзе моңа алып килде. Балачагым күпфатирлы йортта үтте. Анда күзләре начар күргән кешеләр генә иде. Әбием шундый, бабамда бөтенләй күрү сәләте юк. Ул вакытта мин бөтен йортның күзләре идем. Күрү сәләте булмаган күршеләрне шәһәр буйлап озаттып та йөрдем.
16 яшемдә мин аутизм спектры бозылуы булган кыз белән таныштым. Үзем дә сизмәстән аңа атна саен килә башладым. Рәсем ясадык, биедек һәм гади әйберләр турында сөйләштек. Авыр диагноз булса да, аның аралашасы килгәне күзләренә чыккан иде. Ләкин  җәмгыятьтә барысы да мөмкинлекләре чикле кешеләр белән аралашырга әзер түгел. Ул кыз белән дуслашу волонтерлыкка алып килде дисәң дә була. 

– Бу изге эш өчен акча да түләмиләр, барысын да ташлыйсы килгән вакытлар буламы?
– Башкаларга булышу – яшәү рәвешем. Еш кына ярдәм иткән кешеләрдән “рәхмәт” тә ишетмим, шуңа күрә күңел төшенкелегенә бирелгән вакытлар булды. Әмма кешеләргә ярдәм итемичә тора алмыйм. Ул мине бәхетле итә. Әниемнең: “Яхшы кеше бул һәм барысы да сиңа кире кайтачак”, – дигән сүзләре миңа һәрвакыт ярдәм итә.

– Мөмкинлекләре чикле кешеләр белән аралашу үзенчәлекләре бармы?
– Аларны аерырга, җәлләргә кирәк түгел. Мөмкинлекләре чиклеләр янында үскәч, мин аларны гап-гади кешеләр кебек кабул итәм. Ә ярдәмчеләремә кайвакыт авыр була, шуңа күрә волонтерларның хәлен дә белешеп торам. 

– ТИСБИда укыйсыз, эшлисез дә. Чыгарылыш елы да җитмәсә. Ярдәм итәргә вакыт кайдан табасыз?
– Кайвакыт яшәргә дә вакыт юк кебек. Ләкин һәр кешенең буш вакыты бар. Мин аны бүтән кешеләргә ярдәмгә багышлыйм. Бу уку йортымда эшчәнлегем белән бәйләнеп китә. Мин “Мирас” волонтерлар үзәге җитәкчесе. Эшем мөмкинлекләре чикле кешеләр белән элемтәгә керү, инклюзив белем бирүне үстерүдән гыйбарәт.

– Бар кешеләр дә башкаларга ярдәм кулы сузарга тиешме?
– Бу бик камил дөнья булыр иде. Кешенең сайлау хокукы бар, ләкин кешеләр якыннарына, үтеп баручыларга күбрәк игътибар итсәләр яхшы якка үзгәрер идек. Авыр вакытта назлы караш, җылы сүз дә җитә.  

– Үзегезнең нинди хыялыгыз бар?
– Минем хыялым турында бик аз кеше белә. Африка яки Латин Америкасында ярдәм итү программасы буенча мөхтаҗларны укытасы килә. Тормышка куркыныч янарга мөмкин булуны аңлыйм, ләкин әлегә бу хыял мине үсешкә этәрә.

– Хыялыгыз да башкалар язмышына бәйле. Дөньяны үзгәртә алмаячаксың дигән кешеләр дә очрыймы?
– Күпләр бу хыялны аңламый. Ләкин минем үрнәгемне күреп, кемдер игелек юлына басыр дип ышанам. Тормыштан начарны гына эзләсәң, һичшиксез аны табып була. Ә яхшылык – яхшылыкны тарта. 

Илгизә Галиуллина