Ипотеканы каплауга 450 мең сум кемнәргә тиеш?

Бу субсидия айлык түләүләрне киметергә ярдәм итәчәк.

Ипотеканы каплауга 450 мең сум кемнәргә тиеш?
Бу ярдәм төре 2019 елның 1 гыйнварыннан 2023 елның 31 декабренә кадәр өченче һәм аннан соңгы баласы туган гаиләләргә күрсәтелә. Олы балаларның яше һәм ир белән хатын рәсми язылышканмы-юкмы – мөһим түгел. Ипотека килешүе исә 2024 елның 1 июленә кадәр имзаланырга тиеш.

Кемнәрнең гаризалары кире кагылачак?
•    Ата-ана хокукларыннан мәхрүм ителгәннәргә һәм уллыкка-кызлыкка бала алуы гамәлдән чыгарылган гаиләләргә бу түләү бирелмәячәк.
•    Бер гаилә шул бер үк кредитны каплауга ике тапкыр акча ала алмый. Түләү бирелгәннән соң озак вакыт узса һәм тагын балалар туса да мондый мөмкинлек каралмаган.

Бу акчаны ипотекаң булмаса да  алырга мөмкинме?
Юк, чөнки субсидия гамәлдәге ипотека кредитының төп өлешен яки процентларын каплауга гына исәпләнгән.

Түләүнең бер өлешен акчалата алырга мөмкинме?
Юк, бу акча кулга бирелмәячәк. Субсидия ДОМ.РФ исәп счетыннан кредит биргән банк счетына күчереләчәк. Әгәр дә бурыч күләме 450 мең сумнан кимрәк икән, түләү калган сумманы гына каплаячак.

Нинди кредит төрен капларга мөмкин?
•    Төзелә торган яки яңа төзелгән йорттагы фатир алуга.
•    Икенчел базардан сатып алынган фатирга.
•    Шәхси йорт сатып алуга яки төзүгә.
•    Торак төзү, шәхси хуҗалык алып бару һәм бакчачылык белән шөгыльләнү өчен җир кишәрлеге сатып алуга. Бу очракта түләүне йорт төзелеп беткәннән һәм теркәлгәннән соң гына алып була. 
•    Төзелеп бетмәгән шәхси торак төзелеше объектын сатып алуга.
•    Ташламалы төбәк программалары кысаларында торак сатып алуга.
•    Гомуми милектә соңгы өлешне сатып алуга. Бу очракта ипотека алучы бөтен объектның хуҗасына әверелергә тиеш.
•    Рефинансланган кредитларга, әгәр дә алар алда әйтелгән максатларга алынган икән.

Субсидияне ипотекага беренче кертем итеп кулланырга ярыймы?
Юк, 450 мең сумны ипотека кредиты алганда беренчел кертем итеп куллану каралмаган.

Түләү алу өчен кая мөрәҗәгать итәргә?
Түләүне алу өчен гаризаны «Дәүләт хезмәтләре» порталы аша онлайн бирергә мөмкин. Яки ипотека биргән банк офисына мөрәҗәгать итәргә кирәк. Берничә көн эчендә мәгълүмат тикшереләчәк һәм барысы да тәртиптә булса, акча кредитор исәбенә күчереләчәк. Кредит бурычы автомат рәвештә кимиячәк.

Акча күпме вакыт эчендә күчереләчәк?
Түләүне алу вакыты банкка гариза биргәннән соң уртача 7 көн тәшкил итә. Гаризаның статусын «СПРОСИ.ДОМ.РФ» порталында белергә мөмкин. Моның өчен гариза биргәндә банк билгеләгән номерны кертергә кирәк.