Казан кибетләрендә азык-төлек киштәләре бушамаган

Социаль челтәрләр һәм төрле мессенджерларда кибетләрдә ажиотаж турындагы хәбәрләр халыкны борчуга салды. Имеш, халык күпләп азык-төлек, бәдрәф кәгазе, ярмалар, он-шикәр комы ала, киштәләр бушый башлаган.

Әмма редакциянең эшче төркеме күзәткәнчә, әлеге хәбәрләр дөреслеккә туры килми. Аазык-төлек кибетләре, азык-төлек киштәләре бушап тормый. Товарлар күпләп кайта, сатучылар аларны урнаштырып та өлгерә алмый. Паника, ыгы-зыгы өчен бернинди сәбәп тә юк.

– Бер килограмм ярма алдым, калган әйберләр өйдә бар. Артык запас бозыла да бит әле ул. Кибет тулы ризык бит. Бер дә борчылырга сәбәп юк, – дип сөйләде безгә Гөлсем апа Яруллина сәүдә үзәкләренең берсендә.

Аның кебек уйлаучылар саны артканнан-арта бара. Шәһәрнең читтә урнашкан кибетләренә дә сугылдык. Анда шулай ук сәүдә рәтләре тулы. Дөрес, товар алучылар бар, әмма киштәләр бушауга китерми.

Кибетнең менеджеры Светлана Касимова белдергәнчә, кибеттә бераз эш арта төшкән. “Товарларны даими куеп  торырга кирәк. Запас товарлар белән складлар тулы, халык күпләп ала торган ярмалар даими кайтартылып тора”, – дип аңлатты ул безгә.

Россия Федерациясе Авыл хуҗалыгы министрлыгы йөкләмәсе нигезендә, Татарстанда азык-төлек запасы булдырылды, ул кимендә ике айга җитәчәк. Шул ук вакытта республикада продукция запасы сатып алучылар ихтыяҗлары нигезендә даими тулылана. Бу хакта Татарстан Республикасы Авыл хуҗалыгы һәм азык-төлек министрлыгының Матбугат хезмәте хәбәр итә.

Татарстан Республикасы Авыл хуҗалыгы һәм азык-төлек министрының беренче урынбасары Наил Залаков әйтүенчә, хәзерге вакытта республика халкын үзебез җитештерү хисабына төп азык-төлек төрләре белән тулысынча тәэмин ителә.

Татарстан Республикасы Авыл хуҗалыгы һәм азык-төлек министрлыгы төбәк халкын азык-төлек товарларын күпләп сатып алып, ажиотажга бирешмәскә, ә продукцияне сатучыларга бәяләрне арттырмаска чакыра. Кайбер районнарда яшәүчеләрдә бәяләрнең көн дәвамында артуы турында хәбәрләр килә, болар барысы да контрольгә алыначак.

Татарстан Республикасы Президенты Рөстәм Миңнеханов йөкләмәсе буенча республиканың азык-төлек базарларындагы хәлләрне тикшереп тору буенча оператив штаб төзелде, аңа Татарстан Республикасы Авыл хуҗалыгы һәм азык-төлек министрлыгы, Татарстан Республикасы Сәнәгать һәм сәүдә министрлыгы һәм Татарстан Республикасы буенча Монополиягә каршы федераль хезмәт идарәсе керә.