Чемпионат вакытында җәмәгать транспортында йөрергә, ярышларга бер сәгать алдан килергә һәм үкчәле туфли кимәскә

Спортның су төрләре буенча дөнья чемпионатына әзерлек һәм аны үткәрү мәсьәләләренә багышланган матбугат конференциясендә Татарстан Республикасы премьер-министры Илдар Халиков шулай дип белдерде.

- Чемпионатка әзерлекне йөз процент дияргә була, ул ФИНАның бөтен таләпләренә дә туры килә. Спорт объектларында инде спортчылар беренче тренировкаларын да уздыра башлады. Ярышлар уздыру өчен вакытлыча корылган объектларда үкчәле туфли белән йөрү җайсыз булачак, шуңа да гүзәл затларга үкчәле аяк киеменнән баш тартып торырга киңәш итәр идем, - диде ул. Шуннан соң ук: «Ярышлар башланырга кимендә ярты сәгать алдан килүегез дә хәерле», - дип өстәде.

Спорт проектлары башкарма дирекциясе генераль директоры Азат Кадыйров сүзләренчә, бүгенге көндә чемпионатка 160 мең билет сатылган.

- Бу - сатуга чыгарылган билетларның кырык проценты дигән сүз. Соңгы араларда билетлар алучыларның саны арта бара. Узган атнаның ял көнендә генә дә унбер мең билет сатылды. Шунысын да әйтергә кирәк: уналты мең билетны чит ил кешеләре алды. Билет сатып алучылар арасында иң популяр ярышлар - хай-дайвинг, синхрон йөзү, суга сикерү һәм төрле дистанцияләргә йөзү. Ә менә су тубы буенча ярышларга ихтыяҗ азрак. Тик шулай да Россия җыелмасы уйный торган матчларга билетлар калмады диярлек. Спорт мәктәпләрендә шөгыльләнүче балалар турында да онытмадык. Бөтенроссия йөзү федерациясе белән берлектә, ярышларны карарга Россия спорт мәктәпләренең иң яхшы укучылары да чакырылды, - диде ул.

Татарстанның яшьләр эшләре һәм спорт министры Владимир Леонов исә чемпионатта Россия җыелма командасында Татарстан спортчылары да булуын әйтте.

- Әле яңарак кына сигез спортчыга тагын берәү - Игорь Семашко өстәлде. Ул хай-дайвинг буенча ярышларда Россия жыелма командасы составында чыгыш ясаячак. Бу Татарстан өчен зур яңалык. Без аны ике ел элек әзерли башлаган идек. Аның турында бик әйтмәскә тырыштык. Менә хәзер бу хакта әйтергә дә мөмкин - ул Россия җыелма командасына эләкте, - диде министр.

Ул шулай ук Казанга килгән АКШ һәм Канада спортчылары белән аралашуын, аларның Казанны ошатуларын, оештыру, хезмәт күрсәтелү ягыннан канәгать калуларын әйтте. Бүген Казанга 26 илдән барлыгы 300 спортчы килгән. Аларның беришләре инде күнегүләрен дә башлаган. Азат Кадыйров сүзләренчә, башкалабыз көннән-көн олы спорт бәйрәменә «чума» бара.