Ике кыз һәм бер гаилә: көрәшчеләрне котлыйбыз!

Көрәшчеләр җәмәгатьчелеге бүген берьюлы ике нарасыйның дөньяга килүенә куандылар. Иртән иртүк шатлыклы хәбәре белән танылган хөкемдар Динар Зиннәтуллин уртаклашты. Иртәнге 4:56да тормыш иптәше аңа кыз бүләк иткән икән. Шунда ук аны көрәшчеләр, көрәш җанатарлары котлый башлады.

Кызык, шул ук роддомда Татарстанның, Россиянең танылган көрәшчесе, дөнья чемпионы Азат Нурмөхәммәтовның хатыны Гөлнара да бүген бәби тапкан булып чыкты. Алай гына да түгел, Азат белән Динар үзләре дә роддомда очрашканнар. Азатның сөйләве буенча, иртән ул Гөлнараны кертеп җибәреп, машинасында утырганда, күзенә Динар чалынган. Ахыр чиктә, Динарның кызы - 4:56да, Азатның кызы кичке 16:46да дөньяга килгән икән. Үлчәү авырлыкларында да аерма 40 грамм гына. Динар кызының исемен үз постында ук язып куйды: Зифа булачак икән, Алла боерса. Азат исә әлегә сер итеп саклауны кулай күрде. Ни генә булса да, Азатны да, Динарны да котлыйбыз!

Шулай ук бу көнне тагын бер танылган көрәшче Ринат Шәйхетдинов бүген гаилә корган. Аны да шушы истәлекле көн белән котлыйбыз, бәхетле тормыш теләп калабыз.