«Изге Болгар җыены»нда кем батыр исемен яулады?

—Заманча спортта көрәш аерылгысыз урын биләп тора, аеруча Татарстанда. Шуны билгеләп үтәргә кирәк, 1100 ел элек Болгар җирендә Ибн Фадлан татарларда үзләренең көрәш төре булганлыгын билгеләп үткән. Татарларның иң зур ярышын изге Болгар җирендә үткәрү символик мәгънәгә ия, — диде Россия көрәш федерациясе башкарма директоры Ришат Мөбәрәкҗанов.

Урта үлчәү авырлыгының финалында Татарстан көрәшчесе, Россия һәм дөнья чемпионы Динар Кәримуллин һәм Ульяновск өлкәсе көрәшчесе Артур Хәкимов көрәште. Батыр исеменә Динар Кәримуллин лаек булды.

Авыр үлчәү категориясендә халыкара класслы спорт остасы Радик Сәлахов һәм Грузия вәкиле, күп ярышлар җиңүчесе Уча Табататзе абсолют батыр исеме өчен көрәштеләр. Радик - чемпион һәм «Lada Granta» машинасы иясе! Машина ачкычын җиңүчегә Татарстан Республикасы Рәисе Рөстәм Миңнеханов тапшырды.

— Дөресен әйткәндә, нык дулкынландым. Мөхтәрәм кунаклар булгач өстәмә җаваплылык сизәсең. Россияне, Татарстаныбызны оятка калдырмаска тырышабыз. Монысы минем 19 җиңгән машинам, — диде Радик Сәлахов. Ул "Изге Болгар җыены"нда инде өченче тапкыр җиңү яулый икән.

Шулай ук “Изге Болгар җыенында” күптән көтелгән вакыйга: махсус хәрби операция зонасында хезмәт итүче көрәшче Сергей Павлик келәмгә кайтты.

Залинә Гыйләҗиева