Казан чаңгы марафоны: кышны белмәгән кешеләр дә узышта катнаша

Россиядән 600 спортчы 5,30 һәм 50 чакрым арада узыша.
– Быел беренче мәртәбә БРИКС+ муниципалитетлар ассоциациясе вәкилләре дә чаңгы узышында катнаша, – дип хәбәр итте шәһәр Башкарма комитетының физкультура һәм спорт комитеты рәисе Линар Гарипов “эшлекле дүшәмбе” киңәшмәсендә.

Казан мэры Илсур Метшин да фикерләре белән уртаклашып:”Барлык спортчыларга да кышкы сезонны яхшы гына тәмамлауларын һәм шома юллар телибез”, – диде.

Линар Гарипов таныштырганча, марафонда 17 комплект медаль уйнатыла, акчалата призның гомум бәясе 800 мең сум. Катнашучылар араны үзләренең әзерлекләреннән чыгып сайлап ала. Мәсәлән, Олимпия чемпионы Сергей Устюгов – 30, ә Дөнья чемпионатлары җиңүчесе Глеб Ретивых 50 чакрым араны узарга ниятли.

– Мисыр, Алжир, Марокко, Әзәрбайҗан һәм Казахстан спортчылары БРИКС+ вәкилләре узышында чыгыш ясый. Хәзер алар көн саен бик тырышып чаңгыда күнегүләр үткәрә, – диде Линар Гарипов.
Тамашачылар өчен Юдино бистәсе юлындагы “Паравоз” һәйкәле янындагы парковкадан 15 минут саен автобус-шаттл йөреп торачак.