Казанда Бөтенроссия «Россиянең чаңгы юлы - 2026» ярышы узачак

Узган ел ярышта Казанда яшәүче 20 меңнән артык кеше катнашты, быел да оештыручылар фаразы буенча бу саннар әзрәк булмаячак.

14 февральдә Казанда ярышлар берьюлы дүрт урында узачак: 
 - Гаврилов урамындагы трасса (әлеге трассада 20 елдан артык мондый чаралар узмаган);
 - Горки-Әмәт урманы
 - "Локомотив" стадионы (төп мәйданчык) 
 - Дәрвишләр бистәсендәге трасса.

Үткәрү географиясен киңәйтү шәһәрнең төрле районнарында яшәүчеләргә старт өчен уңайлы мәйданчык сайларга мөмкинлек бирәчәк.

Ярыш программасы традицион рәвештә профессионалларга да, һәвәскәрләргә дә исәпләнгән. Әзерлекле спортчылар өчен 5 һәм 10 километрлы дистанцияләр каралган. Ә чаңгыда үз көенә шуарга яраткан катнашучылар өчен 2 километрлы трасса каралган. 2026 елның яңалыгы булып эстафета тора.

Катнашучыларны теркәү "Госуслуги" порталы аша узачак. Теркәлү 12 февраль 19:00 кадәр бара. Ярышларга керү өчен справка һәм иминиятләштерүне рәсмиләштергән язу кирәк.

Моннан тыш, 7 мартта Татарстан башкаласында Казан чаңгы марафоны узачак, ул оештыру дәрәҗәсе буенча Россиянең беренче бишлегенә керә дип искәртә оештыручылар. Чарада чаңгы ярышы буенча Олимпия чемпионы Сергей Устюговның катнашуы көтелә.

Ярышларга әзерлек һәм башка яңалыклар турында "Снежный барс" урта спорт мәктәбе директорының спорт эшләре буенча урынбасары Рөстәм Сафин, Казан шәһәренең Физик культура һәм спорт комитеты рәисе урынбасары Ришат Ибәтуллин һәм чаңгы ярышлары буенча Татарстан җыелма командасы әгъзасы Азим Фәйзетдинов  сөйләп китте. 

Оештыручылар билгеләп үткәнчә: "Әлеге чара ул гаиләләрне, дусларны һәм хезмәт коллективларын берләштерүче зур кышкы бәйрәм. Казанда, гадәттәгечә, трассаларның әзерлеге һәм ярышларны оештыру югары дәрәҗәдә булачак".

Илнар Камаев