Көрәш буенча Татарстан чемпионаты узачак көннәр билгеле. Мөһим үзгәрешләр бар

Көрәш буенча Татарстан чемпионаты 27-29 ноябрь көннәрендә Алабуга шәһәрендә узачак. Теркәлү һәм үлчәнү, җирәбә 27 ноябрьдә үтәчәк.
Нигезләмәдә күзгә күренеп торган берничә пункт бар. Беренчедән, үлчәү категорияләре. Ярышлар 60, 65, 70, 75, 80, 85, 90, 100, 130 килограммга кадәр һәм 130 килограммнан авыррак булган категорияләрдә үтәчәк. Күрәбез ки, 115 килограммга кадәрге үлчәү булмаячак. 115 килолылар соңгы вакытларда үзенә бер элиталы үлчәүгә әйләнгән иде. Бу үлчәүдәгеләр хәзер 100гә кадәр яки 130гә кадәр керергә тиеш булачак. 100гә кадәр едва ли, 130да инде аларга авыррак туры киләчәк. Алай да 130лылар арасында көндәшлек артыр дигән өмет бар.

Ярышлар вакытында тыелган препаратлар кулланучылар бармы-юкмы икәнлеге дә ачыкланачак. Таләпләр шундый хәзер. Тикшерү аерым көрәшчеләрне сайлап алып үткәреләчәк. Мондый тикшерүләр инде күптән уздырылганы юк иде.

Тагын бер момент: Татарстан чемпионаты соңгы дистә елларда беренче тапкыр Казаннан читтә үтәчәк. Нәрсә генә дисәгез дә, республиканың төп ярышын башкалабыздан читтә уздыру бәхәследер, мөгаен.

Кыскасы, көрәшчеләр әзерләнегез. Бер ай (бер ай гына) вакыт калды.

Ярышларның баш хөкемдары – Айрат Миннегалиев.

Шунысы да бар: шул ук көннәргә билбаулы көрәш буенча дөнья чемпионаты узарга тиеш. Димәк, кайбер көчле көрәшчеләрне Татарстан чемпионатында күрмәскә дә мөмкинбез...