«КОС-Синтез» командасы Европа чемпионатында катнашачак

— Без үзебезнең алдыбызга Россия Кубогын яулауны бурыч итеп куйдык. Командабыз көчле. Европа турнирларында катнашу хокукы алдык. Афина шәһәрендә Греция, Италия, Сербия, Германия командалары белән көч сынашачакбыз, — диде «Синтез» спорт клубының генераль директоры Максим Осмоловский.

Россиянең ватерполо командалары катнашындагы быелгы спартакиадада «КОС-Синтез» җиңү яулады. Безнекеләр финалда Әстәрхан шәһәре командасына каршы уйнады.

— Европа чемпионатларында инде 5 ел чыгыш ясамаган идек, үзебезне күрсәтү мөмкинлеге туды. Клуб татарстанлылардан тупланган, Россиянең башка шәһәрләреннән дә сәләтле спортчыларны чакырып алабыз. Безнең клубның яшьләр командасы да бар, «Олимпия резервы» мәктәбе белән дә эшлибез, — диде «КОС-Синтез» ватерполо клубының баш тренеры Евгений Ярощук.

"КСО-Синтез«командасының капкачысы Петр Федотов белән һөҗүмчесе Константин Шейкин, мәсәлән, Волгоградның «Спартак» клубыннан күченеп килгәннәр.

— Казанда спорт корылмалары яхшы. Өлкәннәргә дә һәм яшьләргә дә йөзү белән шөгыльләнергә киңәш итәм. Йөзү организмга файдалы, күңел күтәренкелеге дә бирә, — диде Петр Федотов.

— Европадагы ярышларда кайбер хөкемдарлар Россия командаларына киртәләр куярга омтыла, башкаларны яклый. Бу ике яклы мәсьәлә, яклау тойган команда игътибарын киметә. Без киртәләргә, провакацияләргә бирешмичә җиңүгә омтылып ярышачакбыз, — диде Константин Шейкин.