Кумирыңны күрәсең килсә, пицца аша

Дөнья футболы йолдызларының берсе Криштиану Роналдуның мөлаем йөзен футбол кырында, реклама роликларында күреп тә туя алмаучылар өчен яңа төр сюрприз әзерләгәннәр. Хәзер аның талантына баш иючеләр кумирларының рәсемен пицца ашаганда да күреп тора алачак. Глазгодагы (Шотландия) итальян рестораннарының берсендә футболчының рәсеме төшерелгән пицца пешерүләре турында хәбәр таралды.
Әлеге «шедевр»ның авторы - Bella Napoli ресторанының шеф-повары Доминико Кролла. Тәгамнең составы үзе бик гади - ул камыр, сыр һәм томат соусыннан тора. Моңа кадәр аш-су остасы Барак Обама, Мэрилин Монро, Рианна һәм Робби Уильямсның пицца яратучы җанатарларын сөендергән иде инде.