Мисыр спортчысы Айя Медани: «Яулык аркасында спорттан киттем»

-Миңа сездә бик ошады. Казан Россиянең спорт һәм мөселманнар үзәге булып тора. Безнең мәдәниятләр охшаш. 2010 елда Халыкара йөзү федерациясе (ФИНА) буркинида ярышуны тыйды. Аларның кагыйдәләре буенча һәр спортчының иң башлары һәм тезләре ачык булырга тиеш. Янәсе бу спортчыларга өстенлек бирә. Ә мөселман су киеме авыррак, спортчыларга җиңү өчен күбрәк көч кирәк булуын аңламый алар, - ди кыз.

Бу тыюлар аркасында Айяның спорт карьерасында ике еллык тәнәфес була. 2012 елда ул янә Олимпия уеннарына кайта. Аннан соң спортны яулык файдасына бөтенләйгә калдырырга карар кыла.

-Мин спортка 20 елдан артык тормышымны бирдем. Киткәч, төшенкелеккә бирелдем. Ләкин әле дә спорттан ерак түгелмен. Хәзер һәр кеше, диненә, киенү үзенчәлекләренә карамастан, спорт белән шөгыльләнә алсын өчен көрәшәм. Якын киләчәктә буркинидан йөзү проблемасы да хәл ителер дип өметләнәм, - ди Айя.

- Гадәттә, мөселман хатын-кызын иренә, балаларына хезмәт итеп, гаилә учагына "утын өстәп торучы" буларак күрәләр. Спорт Ислам кануннарына каршы килмиме соң?

-Мөхәммәт (с.г.с) безгә балаларыгызны атарга, атта йөрергә һәм йөзәргә өйрәтегез дигән нәсихәт калдырган. Безнең диндә спортка кагылышлы бернинди чикләүләр дә юк. Киләчәктә Олимпия уеннары да мөселман хатын-кызлары өчен ачык булыр дип уйлыйм. Риода узган уеннар дини тигезлекнең ачык мисалы. Анда Америкада яшәүче мөселман кызы Ибтихадж Мөхәммад фехтования буенча бронза медаль яулады. Яулык аңа үзен күрсәтергә комачауламады. Без исә мөселман кызлары Олимпия уеннарында катнаша алсын өчен көрәшне дәвам итәчәкбез, - ди Айя.