Муса Җәлил турнирында тамашачылар да бүләкле булачак...

Билгеле булганча, көрәш буенча "Ватаным Татарстан" газетасы гамәлгә куйган Муса Җәлил истәлегенә турнир 18-19 март көннәренә билгеләнгән. Көрәшчеләр Казанга 17 мартта килеп үлчәнергә тиеш булачак. Ярышлар "Ак Барс" Көрәш сараенда узачак. Биредә бүләкләр дә мулдан булачак.

ТР Көрәш федерациясе башкарма директоры Марсель Таһиров хәбәр иткәнчә, башка еллардагы матур гадәт быел да дәвам итәчәк. Аерым алганда, узган елның көрәш сезоны нәтиҗәләре буенча иң яхшы көрәшчеләрне, иң яхшы тренерларны бүләкләү каралган. Быел исә тагын бер яңалык кертергә булганнар: оештыручылар тамашачылар арасында да бүләкләр уйнатачак. Кыйммәтле бүләк отарга теләүчеләр 200 сумга билет алырга тиеш булачак.

Хәбәр иткәнебезчә, 26 мартта Яр Чаллы шәһәрендә мөселманнар арасында татар милли көрәше һәм кул көрәше буенча берләштерелгән Россиякүләм турнир да үтәчәк. Быел әлеге турнирны оештыру һәм уздыру Татарстан һәм Россия көрәш федерацияләре катнашында узачак. Шул исәптән, бүләкләр, приз фондын формалаштыруда да. Димәк, Чаллыдагы ярышлар да югарырак дәрәҗәгә күтәреләчәк дигән сүз.

Дөньялар тыныч булсын иде!