Рөстәм Миңнеханов Балтач районы Кариле авылында хоккей турнирына старт бирде

Бүген Балтач районының Кариле авылында Татарстан Республикасы Рәисе Рөстәм Миңнеханов катнашында балалар хоккей турнирына старт бирелде. Чара бер ай элек «Россия — спорт державасы» форумы кысаларында Россия Президенты Владимир Путин тарафыннан тантаналы рәвештә ачылган «Балтач Арена» заманча Боз сараенда узды.

Шул рәвешле, Кариле авылында һәм Балтач районында яшәүчеләр ел әйләнәсендә яраткан спорт төре белән шөгыльләнү, сәламәтлекләрен ныгыту һәм буш вакытларын актив үткәрү мөмкинлегенә ия. Турнир «Россия спорты» дәүләт программасы максатларына туры китереп, балалар һәм яшьләр арасында сәламәт яшәү рәвешен популярлаштырып уздырыла.

"Бүгенге көндә республикада 54 боз сарае ачылган инде. Татарстан Рәисе Рөстәм Миңнеханов кушуы буенча 2030 елга Татарстанның барлык муниципаль районнарында ата-аналар балаларын спортка бирә алырлык объектлар төзү планлаштырыла», - дип билгеләп үтте ТР спорт министрының беренче урынбасары Хәлил Шәйхетдинов. Боз сарайларын төзү буенча республика программасы буенча 5 ел эчендә 12 яңа объект барлыкка киләчәк. 2026 елда Аксубай, Яңа Чишмә һәм Тукай районнарында төзелеш башланачак.