Көрәшчеләр әзерме? «Тренер икенче әти кебек»

Сезонның иң яхшы футболистына «Алтын туп» тапшырдылар. Безнең көрәшчеләрнең исә, яңа көрәш сезоны башлана гына. Көрәшчеләр сезонга әзерлек барышында нинди хисләр кичерә? Яңалыклары бармы? Бу сорауга җавап табар өчен тәҗрибәле, танылган көрәшчеләргә дә, көрәш дөньясында үз исемен танытып килүче, өметле яшьләргә дә мөрәҗәгать иттек.

Лаеш өчен көрәшүче Алексей Абрамов быел яңа авырлык категориясендә көрәшергә булган. Элек 60 кг авырлыкта көрәшкән булса, хәзер шул күрсәткечен биш килога арттырган. Ул хәзер 65 кг авырлыкта бил алышачак. Бу категориядә көрәшүче егетләр арасында көчлеләр шактый, шуңа күрә Алексей яңа сезонга бик җаваплы карый.

– Көрәштә артык яңа алымнар куллану җиңелләрдән түгел, ешрак үземнең тәҗрибәгә таянам, искеләрен дә, яңаларын да кулланырга тырышам. Яңа авырлык категориясенә күчкәч, сәламәтлеккә дә игьтибар кирәк, әлбәттә. Табиб сүзләренә колак салам һәм аның барлык киңәшләрен үтәргә тырышам, – ди Алексей. Психологик һәм физик яктан яңа сезонга әзерләнүнең кирәклеген чемпионнар да бик яхшы аңлый.

Чаллы өчен көрәшүче Радик Сәләхов сезонга әзерлекне башлап җибәргән инде. Тәҗрибәле көрәшче булса да, "тренер икенче әти кебек", ди ул.

– Без хәзер яшь көрәшчеләр түгел, белгән алымнарыбызны шомарта барабыз. Яңа сезонда күнекмәләр программасы үзгәрми, шулай ук дәвам итә,-ди көрәшче. Шулай да батырлар психологик яктан әзерлек кирәклеген ассызыклый. - Психологик яктан әзерлек яхшы. Яңа сезонга кергәндә үк үземне нәтиҗәгә эшләргә өндим. Рационга килгәндә, диеталарда утырганым юк. Ит ашыйбыз, сөт эчәбез, Аллаһка шөкер, - ди Радик.

Балтач өчен көрәшүче Ислам Бурашов исә, психологик яктан тулаем әзерләнеп бетеп булмый дигән фикердә. – Барысы да тәҗрибә белән килә. Ярышларда күбрәк катнашкан саен, психологик яктан тотрыклы буласың. Тренерым белән берлектә яңа алымнар өйрәнәм, - ди ул.

Казанда яшәүче Данил Әүһәдиев яңа сезонга зур өметләр баглый. Шуңа күрә тренировкаларын көчәйтелгән режимда башларга һәм төп игътибарны техник өлешкә юнәлтә: Аның фикеренчә, спортчы, беренче чиратта, көндәшен җиңә алуына ышанырга тиеш.

– Уйларыңда ярышны күз алдына китерәсең. Тренировкада да шуны онытырга ярамый. Болар барысы да җиңүгә этәрүче мотивация, - ди ул. Данил да барлык көрәшчеләр кебек үк тренерына бик рәхмәтле һәм аның фикерләренә колак сала.

Гөлия Хәйруллина